Fin na tres luna na kas Parlamentario Monte ta proponé mas seguridat pa trahadónan

Fin na tres luna na kas

Parlamentario Monte ta proponé mas seguridat pa trahadónan

 

Parlamentario pa frakshon di MFK, señor Ishahier Monte, ta desaroyando un inisiativa di lei ku ta enfoká riba e redukshon di e término intermediario den e regulashon di kadenanan di trabou, di tres luna pa un siman, ku e meta pa mehorá e balansa entre fleksibilidat laboral i seguridat pa trahadónan.

 

Den e práktika aktual, kontratonan laboral pa tempu determiná por wòrdu interumpí pa un periodo di tres luna, despues di kua por kuminsá un siklo nobo di kontratonan temporal. E konstrukshon aki ta resultá den situashonnan kaminda trahadónan ta wòrdu manda kas na final di nan kontrato temporal pa un periodo di 3 luna pa despues bolbe drenta den servisio riba un base temporal, sin ku nunka nan por yega na un kontrato pa tempu indefiní. Señor Monte ta kalifiká e práktika aki komo indeseabel i ta debilitá e prinsipio di seguridat hurídiko di trahadónan i ta afektá nan posishon den e relashon laboral.

 

E inisiativa di lei ku señor Monte ta trahando riba dje ta enserá un redukshon sustansial di e término intermediario di tres luna pa un siman, ku e meta pa eliminá interupshonnan artifisial den relashonnan laboral i pa garantisá ku trabou ku ta di karakter struktural ta resultá tambe den seguridat struktural. Esaki por nifiká mas seguridat di trabou pa e trahadó. 

 

Den e regulashon aktual, trahadónan por keda tres luna sin entrada, ounke den práktika nan ta bolbe na e mesun doño di trabou. E redukshon na un siman ta nifiká ku no tin un periodo largu sin suèldu i ku kontinuidat di entrada ta wòrdu mihó garantisá. Ku un término di un siman, kontratonan den práktika ta kontinuá sin interupshon, loke ta permití ku e trahadó ta yega mas lihé na un kontrato di tempu indefiní. E redukshon aki ta kontribuí na mas previsibilidat di entrada i ta fortalesé e posishon finansiero di e trahadó. Ademas, ku e término nobo aki, e trahadó ta para huridikamente mas fuerte i ta bira ménos dependiente di interupshon arbitrario den e relashon laboral. 

 

Señor Monte a indiká di lo profundisá i elaborá e proposishon di lei aki den estrecho konsulta ku partnernan sosial, inkluyendo organisashonnan di trabou, sindikatonan i ekspertonan den derechi laboral. E meta ta pa yega na un regulashon ku ta karakterisá pa su solides hurídiko i alabes ku ta praktikamente realisabel i efektivo den su implementashon.

 

Ku esaki parlamentario Monte ta kere ku asina ta traha riba un merkado laboral kaminda trabou no ta simplemente temporal, sino ku ta duna seguridat i perspektiva real pa futuro.

 

Ishahier Monte

Parlamentario pa Frakshon di MFK