NOS SELEKSHON NASHONAL TA NA OUSTRALIA PA PARTISIPÁ NA E TORNEO FIFA SERIES 2026!

NOS SELEKSHON NASHONAL TA NA OUSTRALIA PA PARTISIPÁ NA E TORNEO FIFA SERIES 2026!

 

E selekshon di Kòrsou a yega Sydney Oustralia i ta kla pa inisiá seshonnan di entrenamentu den kuadro di nan partisipashon na e torneo FIFA Series 2026.

E miembronan di nos selekshon a biaha for di diferente pais i via diferente buelo pa logra yega Sydney. E staf di nos selekshon ayega Oustralia dia 22 di mart último miéntras mayoria di e hungadó a biaha despues di wikènt debí na kompromisonan di kampionatonan ku ta áktivo. Esei a pone ku algun hungadó por a biaha entre djaluna i djamars, 23 i 24 di mart respektivamente. 

E delegashon ta keda na Pullman Sydney Olympic Park Hotel riba Olympic Boulevard i ta un lokashon ekselente pa e hungadónan por aklimatisá despues di a traspasá den diferente zona di tempu ku buelonan largu.

E promé seshon di entrenamentu lo tuma lugá  awe na stadion Sydney Olympic Park i mañan nan lo bolbe entrená pa nos promé partido. Djabièrne 27 di mart binidero, Kòrsou ta hunga kontra di China den Accor Stadium pa 5’or atardi ora lokal i 2’or di mardugá, orario di Kòrsou. Siguiente dia, djasabra  28 di mart, nos selekshon ta train mainta i mèrdia ta subi avion rumbo pa Melbourne pa inisiá preparashon pa e partido kontra Oustralia. E partido aki ta programá pa tuma lugá riba djamars 31 di mart, 10 pasá di 8’or anochi, ora lokal i 5’or di mardugá ora di Kòrsou.

Despues di e partidonan aki nos selekshon lo biaha di regreso pa Amsterdam, djárason promé di aprel 2026. Nos próksimo kompromiso lo ta dia 30 di mei kontra Schotland aya na Schotland.

Keda pendiente pa mas informashon…

25 mart 2026