Konferensia tokante Rapòrt Edukashonal (OKR)

Gran asistensia i embolbimentu na konferensianan di Ministerio di ESKD tokante transishon di enseñansa di fundeshi pa enseñansa sekundario

Willemstad – Ministerio di Enseñansa, Siensia, Kultura i Deporte (ESKD) ta mira bèk ku hopi satisfakshon riba un fin di siman di konferensia sumamente eksitoso, durante kua a organisá un konferensia pa maestro i  kuater konferensia pa mayor. E seshon pa maestronan a tuma lugá riba djabièrnè 20 di mart 2026  i pa mayornan riba djasabra 21 i djadumingu 22 di mart 2026., inkluyendo dos seshon kada dia.

Total ministerio a risibí mas ku 200 maestro i mas di 1.100 mayor. E asistensia grandi i embolbimentu aktivo a mustra riba e nesesidat pa informashon, transparensia i diálogo tokante kambionan den transishon di enseñansa di fundeshi pa enseñansa sekundario.

Durante e konferensia, den kua inovashon den enseñansa tabata sentral, a splika dikon ministerio ta skohe pa un aproksimashon kaminda no solamente un momento di prueba (EFO) ta determiná resultado, sino kaminda e bista mas amplio di desaroyo di e mucha ta para sentral i ta registrá den e rapòrt edukashonal (OKR). Asina ministerio ke pone énfasís riba desaroyo integral, posibilidatnan igual i futuro di kada mucha.

Minister Sithree van Heydoorn a habri e konferensianan ku un splikashon tokante e inovashon aki i e importansia di igualdat di oportunidat, konfiansa i un bista mas amplio riba e alumno. Pa minister ta importante ku mayor i maestro no solamente tende ku tin kambio, pero tambe komprondé dikon ministerio ta hasi e eskoho aki. Na final, ta trata di nos muchanan, nan desaroyo i nan futuro. “P’esei a skohe pa un sistema ku ta mira mas ayá di solamente un momento di prueba,” asina minister Sithree van Heydoorn a bisa.

E programa a inkluí kontribushon di diferente ekspertonan di  tantu den komo pafó di ministerio. Señor Wladimir Kleinmoedig, direktor di sektor Enseñansa i Siensia, a papia riba e base legal i di maneho di e kambionan. Drs. Saby de Bies, lider di proyekto di e OKR renobá, a duna splikashon riba e kontenido i aplikashon di e rapòrt digital. Drs. Nancy Josephina a splika e perfilnan di alumno pa HAVO, VSBO i AGO, miéntras ku Samira Saab a trata e prosedimentunan tokante opheshon i inskripshon. Ortopedagogo Yaniek de Wolff a presentá un keynote riba e influensia di prehuisionan konsiente i no konsiente den evaluashon di muchanan, tantu serka mayor komo maestro, i tambe kon ekspektativanan i preshon riba prestashon por bai fuera di balansa di esfuersonan i limitashonnan di un mucha.

Kada seshon a terminá ku un diskushon di pènel interaktivo, moderá pa sra. Muriël Meyer. E konferensianan ta karakterisá pa partisipantenan atento, kombersashonnan konstruktivo i preguntanan krítiko ku kontenido. Sigur bou di mayornan, e embolbimentu tabata grandi. Hopi pregunta a bai riba e manera ku ta formulá i forma e konseho di skol, kon ta garantisá ophetividat , kua ròl e OKR renobá ta hunga i kua prosedimentunan ta aplikabel pa inskripshon i opheshon. Tambe durante e konferensia di maestro a surgi puntonan importante, manera e aplikashon práktiko di e inovashonnan, e ròl di skolnan i maestro den e proseso aki, i e guia ku mester tuma lugá di forma kuidadoso pa alumnonan  durante e transishon pa enseñansa sekundario.

Ministerio ta mira bèk ku apresio riba e atmósfera positivo i habrí, kaminda a krea  espasio pa tantu preokupashon komo klarifikashon. Ministerio di ESKD lo sigui enfoká riba komunikashon, splikashon i diálogo ku skolnan, maestro, dosente i mayor, no solamente riba e inovashon aki, pero tambe riba otro tema relevante den enseñansa. Via e kanalnan di medionan sosial di ministerio, pronto lo kompartí grabashonnan di e seshonnan.

Huntu nos ta sigui traha na un sistema di enseñansa kaminda desaroyo di kada mucha i oportunidat igual ta sentral.

—

KOMUNIKASHON