Lansamentu Kampaña e 7 Prinsipionan di Kooperativa

Inisiativa di Minister Middelhof i su ministerio pa krea konsientashon tokante kooperativismo

Willemstad – Minister di Desaroyo Ekónomiko, Roderick Middelhof huntu ku su ministerio (MEO) a lansa un kampaña informativo via di retnan sosial pa para ketu na e 7 prinsipionan di kooperativa. E kampaña, titulá “E 7 Prinsipionan ku ta Inspirá Kooperativa”, ta dura 7 siman i kada siman lo enfoká riba un di e prinsipionan fundamental ku ta guia e movementu di kooperativa mundial.

E kampaña aki ta sigui despues ku na aña 2025, MEO a bini ta ko-organisá un seri di aktividat huntu ku partnernan den kooperativismo na Kòrsou, den kuadro di Aña di Kooperativa. E kampaña lo kore durante e lunanan di mart i aprel 2026.

Kooperativanan ta fundamental pa un ekonomia sosial, inklusivo i sostenibel. Nan ta uni esfuerso di persona i komunidat, ta krea trabou, stimulá inovashon i fortalesé solidaridat. Segun Minister Middelhof, kooperativanan no ta solamente un forma di organisashon, sino un instrumento stratégiko pa diversifiká ekonomia di Kòrsou i pa amplia partisipashon di siudadanonan den aktividatnan ekonómiko.

E 7 Prinsipionan di Kooperativa ta: atmishon habrí i boluntario; maneho demokrátiko; partisipashon ekonómiko di miembro; outonomia i independensia; edukashon, formashon i informashon; Kooperashon entre kooperativanan i Responsabilidat na komunidat.

“Nos kier un ekonomia kaminda mas hende por partisipá aktivamente i benefisiá di e kresementu. Kooperativanan ta duna oportunidat real pa komunidatnan organisá nan mes, generá entrada i kontribuí na desaroyo di nan ambiente. Esaki ta aliniá direktamente ku e plan di gobernashon pa fortalesé pilarnan di ekonomia sosial, stimulá komèrsio i redusí dependensia di sektornan tradishonal,” segun Minister di Desaroyo Ekonómiko.

E kampaña tin komo meta pa oumentá konosementu i komprondementu i mustra kon e prinsipionan di kooperativa por sirbi komo guia pa un modelo ekonómiko mas inklusivo i duradero. E ta kontribuí na prioridatnan di gobièrnu manera diversifikashon ekonómiko, fortalesementu di empresanan chikí i mediano i komunidatnan lokal, i promoshon di inovashon sosial.

Minister Middelhof ta invitá un i tur pa sigui e kampaña riba nos plataformanan di Facebook i Instagram i partisipá aktivamente.

Mas informashon tokante kooperativanan na Kòrsou
Hendenan interesá pa sa mas tokante kooperativanan òf kon bira sosio di un kooperativa, por tuma kontakto ku e siguiente organisashonnan:

• FEKOSKAN – Federashon Union di Krédito; ta representá i sostené kooperativanan di Spar i Krédito via www.fekoskan.coop, info@fekoskan.coop, 4623670 òf 4623657.
• FKUP – Federashon Kooperativanan Uní di Produkshon; ta fortalesé emprendementu i kolaborashon ekonómiko via FKUP – Curaçao riba Facebook i fkupcurazao riba Instagram, federashonkup@gmail.com òf 5193215.
• FESK – Fundashon Ekonomia Sosial Kòrsou; enfoká riba impakto sosial i desaroyo di komunidat via ekonomiasosial@gmail.com òf 6933436.