Bishita di trabou na Hydroponic farm di señor Thielman

Bishita di trabou na Hydroponic farm di señor Thielman

Willemstad – Djabièrnè 13 di mart 2026 ekspertonan di Ministerio di Salubridat, Medio Ambiente i Naturalesa huntu ku señora Jenny Albertina a hasi un bishita di trabou na kunuku di hidroponia di señor Shurandy Thielman situá na Sta. Catharina. 

Hidroponía ta un kultivo sin suela pa kultivá mata den awa ku e nutrientenan (vitamina di mata) dislové aden. E téknika aki ta pone ku kresementu di mata ta bai mas rápido, ta haña mas kosecha i e sistema ta uza aproksimadamente 90% ménos awa kompará ku plantamentu tradishonal den tera.   

Komo Kòrsou ta un isla seku i tin poko disponibilidat di tereno e téknika aki ta sumamente útil, debí ku ta uza ménos awa riba un superfisie relativamente chikítu pa produsí bèrdura i yerbanan entre otro yerba buena i bacillinum. 

Ta uza “Dutch buckets” pa produsí promentón, tomati i kònkòmber salada. Ta apliká “Nutrient Film Technique” (NFT) hidroponía pa produsí un tipo di “ijsbergsla”. Ta uza mashinnan hopi avansá pa fria e awa na un temperatura di 19˚ Celsius, ta apliká Ozon (O3) pa kontrolá entre otro malesanan, ta uza ventilashon i tin mashinnan pa garantisá ku tur e matanan ta risibí e vitaminanan nesesario.  

E kunuku hidroponiko ta den operashon máksimo i su produkto prinsipal ta un tipo di kròpsla. 

E representantenan di Gòbièrnu a keda impreshoná ku e avansenan ku e produktor ta hasiendo. Gobièrnu ta sostené i promové tur e téknikanan moderno aki, pa asina yuda  kontribuí na oumentá seguridat alimentisio di Kòrsou.

Potrèt 1 i 2. Señor Thielman ta splika tokante e asina yamá “Dutch buckets” ku promentón, tomati i kònkòmber salada. Pòrtrètnan F. Dilrosun.      

Potrèt 3 i 4. Mashin ku ta regla fluho di Ozon (O3), 2 chiller, barínan i mashin ku ta regla fluho di fertilisante. E awa ku ta pasa den e pipanan tin temperatura di aproksimadamente 19˚C.       

Potrèt 5 i 6. “Nutrient Film Technique” (NFT) hidroponía di un tipo di “ijsbergsla” na ámbos banda di e kas ku airu ku ta supla for di abou.        

Potrèt 7 i 8. Matanan chikítu di sla den kriadero i señor Thielman ta splika tokante e proseso di hidroponía. Pòrtrètnan F. Dilrosun.