Segun sra. Geselle Rosaria – Coffi, Presidente di Fundashon Nos Grandinan Tin plannan grandi i maravioso pa e merkado di hende grandi

Segun sra. Geselle Rosaria – Coffi, Presidente di Fundashon Nos Grandinan Tin plannan grandi i maravioso pa e merkado di hende grandi

Fundashon Nos Grandinan ta hopi kontentu pa mira kuantu atenshon nos politikonan i tambe empresanan lokal a duna nos grandinan, promé di òktober último, riba Dia Internashonal di Hende Grandi. Na aña 2000, sra. Geselle Rosaria – Coffi, a tene e promé evento grandi pa tur hende grandi, tantu di kasnan di ansiano komo grandinan ku ta hospedá den nan propio kas, nétamente riba e Dia Internashonal di Hende Grandi. E evento aki a kousa un impakto positivo enorme. Di e forma aki, Kòrsou kompletu a wòrdu konsientisá ku tin un Dia Internashonal nétamente pa Hende Grandi. Tanten ku áñanan a bin ta transkurí, e baby Fundashon Nos Grandinan a nase i eventualmente a take over e Dia Internashonal di Hende Grandi i a sa di mantené bibu. Fundashon Nos Grandinan tin mas idea rondó di e dia tan spesial aki pa nos grandinan: Fundashon Nos Grandinan a aserká sra. Minister Ruthmilda Larmonie ku e petishon pa dekretá luna di sèptèmber òf luna di òktober komo “Luna pa Nos Grandinan”, habriendo espasio pa tur hende, instansha i stakeholders ku ke duna atenshon i rekonosimentu di un manera òf otro na nos grandinan, tin espasio den hinter un luna pa hasi esaki. Ku e “Luna pa Nos Grandinan”, nos grandinan lo haña tur atenshon di mundu diariamente pa un luna largu. E luna aki lo kontribuí na subi nan nivel di bida, e lo aportá tambe na un komunidat ku lo bai tin mas respèt real pa nan, hende grandi nan bos lo resoná i por último tur suidadano ta keda konsiente ku nos tur ta den proseso di kresementu. Lamentablemente, Fundashon Nos Grandinan no a tende nada mas di nos petishon na sra. Larmonie i Ministerio di SOAW. Fundashon Nos Grandinan ta urgi e gobièrnu nobo ku sinta, sea ta esun aktual ta bin bèk òf un nobo, pa nos ban traha mesora riba e dekreto pa por tin un “Luna pa Nos Grandinan”, kuminsando riba e Dia Internashonal pa Nos Grandinan òf ku un kulminashon riba Dia Internashonal pa Nos Grandinan. Aparte, Fundashon Nos Grandinan, meskos ku otro paisnan ya kaba tin, lo buska pa logra tambe un Dia Nashonal pa Sentenarionan. Sentenarionan (100+) ya ta un niche mundialmente i ta importante pa kada pais duna atenshon firme riba un dia spesial pa e personanan di mas bieu den nos komunidat. Finalmente, Fundashon Nos Grandinan ke informá tur hende grandi di edat i esnan ku ta yegando e edat di 60 aña, tene un poko pasenshi mas, tin proyektonan grandi i dinámiko na kaminda ku lo pone nos grandinan for once and for all riba e pedestal ku nos grandinan meresé di ta ariba. Na komunidat kompletu, sra. Rosaria a terminá bisando: “kuida i stima nos grandinan, saka tur djus posibel for di nan. Awe ta nan ta grandi, mañan Dios ke ta Bo i kòrda semper ku grandinan ta e fundeshi di pais Kòrsou”.

ruthmilda-larmonie

ruthmilda-larmonie2

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: