Kasi kuater luna di “Tereno pa Tur, pero na òrdu si!” Mas perspektiva, ménos ilegalidat

ministerio-di-planifikashon-urbano-i-tereno-na-ordu

Kasi kuater luna di “Tereno pa Tur, pero na òrdu si!” Mas perspektiva, ménos ilegalidat

Willemstad – Minister Camelia-Römer huntu ku Domeinbeheer djaluna ultimo a mira bèk riba kasi kuater luna di atendé seriamente ku okupashon ilegal di tereno di Gobièrnu. Tur kaminda por a tende e lema “Tereno pa tur, pero na òrdu si” durante di e kampaña pa informá i motivá e públiko i duna splikashon tokante di e maneho di ‘Sero Toleransia’ ku ta vigente for di òktober 2015, ora ku Minister Camelia-Römer a hala un strepi i a introdusí esaki pa stòp kasonan nobo di okupashon di tereno ilegal. Na yüni a kuminsá ku un kampaña di informashon pa splika kiko ta pasa ku okupashon di terenoilegal eksistente, esta ku ta kai bou di e maneho di hopi aña pa legalisá lokual por. Por konkluí ku e mensahe ku ta pone òrdu a haña bon akohida serka nos pueblo.

Formalisashon
E meta di e kampaña ta pa eliminá ilegalidat pa medio di formalisashon, te kaminda esaki ta posibel. Pa logra esaki Domeinbeheer ta traha pa registrá tur uso ilegal. A lanta un tim ku ta spesialmente enkargá ku e tareanan aki. For di luna di ougùstùs a tene seshonnan di informashon den diferente bario, kaminda ta brinda oportunidat pa mèldu boluntariamente i hasi un petishon pa bini na remarke pa eventual formalisashon. Despues di tres seshon di informashon na Montaña, Rooi Santu i Santa Maria, un total di 203 siudadano a registrá. Huntu ku otro kasonan di petishon pa formalisashon, tin en total 680 petishon di formalisashon den prosesamentu.

Banda di esaki, siudadanonan tambe ta mèldu kasonan di okupashon ilegal. Callcenter di Domeinbeheer a risibí 143 yamada tokante 72 kaso di konstrukshon, 29 kaso di bentamentu di sushi, 15 kaso di kobamentu di greis i 27 otro tipo di kaso mas.

Mantenshon di òrdu
Trabounan di mantenshon di òrdu ta tuma lugá simultáneamente. Ku e meta pa stòp okupashon ilegal eksistente, un tim ta tur dia riba pia ta kontrolá rònt Kòrsou pa kaminda ku tin kaso di okupashon ilegal, stòp esaki, i evitá pa kuminsá ku kasonan nobo. Den e kuadro aki a papia ku siudadanonan pa splika nan di e maneho di ‘Sero Toleransia’ i a pone bòrchi pa prohibí okupashon i konstrukshon ilegal.

Informashon
Okupashon ilegal ta algu sumamente serio, ku konsekuensia grave pa pueblo. P’esei e kampaña di informashon ta dirigí na hasi pueblo konsiente. Ta usa aviso den korant, spòt di radio i televishon, facebook, website http://www.terenopatur.com ku splikashon mas amplio i un number di telefòn 0800-1919 disponibel kaminda por yama pa mas informashon. Tambe tin un bosero dediká pa bai den programanan di informashon i duna kontesta riba tur pregunta.

Perspektiva
Pa medio di su trayekto di mehorashon “Rumbo pa Ekselensia”, Domeinbeheer ta mehorá su servisio i produktonan pa asina kumpli mihó ku nesesidat di pueblo. Vários proyekto ya ta inisiá, manera por ehèmpel revishon di e lista di espera pa tereno di ‘erfpacht’ a base di database di Kadaster i Kranshi.

Tambe ta konstruí 134 kas sosial na Sapaté, Montaña ‘Bou, Tera Kòrá, Barber i Bonam, huntu ku Ministerio di Desaroyo Sosial, Labor i Bienestar i Fundashon Kas Popular. Un proyekto ku FKP ta kompaña ku 134 kas mas, pa un total di 268 kas. Ademas a start ku e proyekto ‘Bo kas na bo Midí!’ na Sapaté, ku a konta inmediatamente ku un interes hopi grandi, ya ku e ta yena un nesesidat di hopi siudadano: un kas pagabel, ku e por sigui amplia segun su deseo i posibilidatnan.

Adishonal a duna aprobashon pa den e próksimo dos añanan traha 750 kas di Fundashon Kas Popular na Wechi i ta traha riba e pèrmitnan di konstrukshon. Tambe a pone disponibel 1.332 tereno pa konstrukshon di bibienda pa kontratista grandi i chikí. Tin 140 tereno mas ku ta den proseso pa tambe por traha kas riba dje.

Ademas lo prepará 950 tereno pa hende mes konstruí nan kas (zelfbouw), ya asina ei klientenan riba lista di espera ku ke esaki, por konstruí nan kas segun nan soño.

E barionan kaminda e 3.000 kas i terenonan ta bini ta entre otro Montaña ‘Bou, Sapaté, Tra’i Seru, Mahuma Zuid, West Ronde Klip, Bonam, Brakkeput, Maria Maai, Barber, Weto, Kurá Piedra i Fortuna Ariba.

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: