Erwin Raphaela: 10 òktober 2016 un simpel dia liber.

10 òktober 2016 un simpel dia liber.

Sea ku nos tur ta di akuerdo ku e palabrashonnan será ku Ulanda relashoná ku status outónomo di Kòrsou den reino 6 aña pasá òf nò, e fecha 10-10-10, kaminda a firma tratado ku Ulanda riba e status outónomo di Kòrsou den reino, tambe ta parti di nos proseso emansipatorio. Realidat ta ku komo pueblo di Kòrsou na aña 1954 en prinsipio a sali for di tabata un kolonia ulandes pa poulatinamente yega na un pais ku lo mester para riba su pia i atendé su propio asuntunan. Tin bosnan ta bisa ku atraves di status outónomo den reino, manera kumbiní pa drenta na vigor 10-10-10, Kòrsou a bai atras, pasobra nos ta mas den gara di Ulanda ku nunka! Enfin, por a uza e dia 10 di òktober 2016, sikiera pa analisá i mira patras anto riba nos fayonan. Komo tal na mi pareser, e ta kompletamente robes i iresponsabel pa hasi komo si fuera no ta bale la pena dediká atenshon na e parti aki tambe di e proseso emansipatorio. Historia a demostrá ku emansipashon di e pueblo kurasoleño no a kuminsá durante e preparashonnan pa e status outónomo, sino muchu mas promé ku esei, for di e tempu di Efrain Jonckheer, Moises Frumencio da Costa Gomez i otronan, kendenan tabata boga pa mas libertat pa pueblo disidí riba su mes asuntunan, anto te hasta mester bai ainda mas patras te na e temporada di sklabitut ku e tantísimo rebeldia i lantamentunan di katibunan. Tampoko mester lubidá e papel di sindikalistanan ku wèlganan den haf etcetera.
Ta lógiko ku hasiendo komo si fuera 10 di òktober 2010 direpente kasi no tin ningun klase balor ni importansia pa yunan di Kòrsou di e forma aki sigur tampoko no ta kontribuí pa yunan di Kòrsou ta mas patriótiko. Nos por a maske ta uza e momentonan aktual pa para ketu riba lokenan nos ke drecha ainda. En kambio siendo ta trata di un asuntu asina fundamental, ku ta relashoná direktamente ku pasonan pa yega na soberania, nos i hinter e pueblo aki huntu ku su gobernantenan ta desplegá un aktitut di falta di interes i balor propio! No a ni sikiera para ketu pa reflekshoná riba kiko a logra te asina leu of kiko por mehorá den futuro. Ami Erwin Raphaëla, mirando ku esaki ta netamente e tarea i responsabilidat di gobièrnu, mi ke protestá enfátikamente kontra di gobièrnu Whiteman ku a laga e dia aki pasa bai sin nada di esfuerso pa duna maske ta algu di kontenido manera a sosodé. Den mi bista ta e forma mas kondenabel pa tene un pueblo bobo, sumiso, pasivo i totalmente desinteresá pa su kousa riba e trayekto di emansipashon. Natural tabatin hopi otro forma pa por a atendé ku e dia aki i di un manera ku tòg lo a para ketu na puntonan di interes pa nos tur, pasobra si no ke papia mes di polítika i of gobernashon, anto por a skohe pa kombibensia, sentido di patriotismo, kontròl sosial etcetera of por a elaborá brevemente riba e papel di otronan manera Moises Frumencio da Costa Gomez, Efrain Jonckheer, Felix Chacutu di felis memoria. Lamentabel ta e aktitut no kamuflá di awendia kaminda dirigentenan di e pais aki práktikamente ta duna balor únikamente na aspektonan puru materialista i no otro puntonan ku tambe ta esensial den nos proseso di formashon komo pueblo.
Erwin Raphaela