Global Entrepreneurship Week Curaçao ku programa di aktividat hopi variá i atraktivo pa 2016

gew_curac%cc%a7ao-2

Global Entrepreneurship Week Curaçao ku programa di aktividat hopi variá i atraktivo pa 2016

WILLEMSTAD – Djaweps atardi a tuma lugá un enkuentro informativo relashoná ku Global Entrepreneurship Week Curaçao (GEWCuraçao) ku lo tuma lugá e siman di 14 pa 20 di Novèmber próksimo.
GEW ta un insentivo di Global Entrepreneurship Network ku aktualmente ta ser selebrá na mas di 165 pais rònt mundu. Global Entrepreneurship Week (GEW) tin komo ophetivo pa inspirá hende na tur parti di mundu pa eksplorá posibilidatnan di negoshi via aktividatnan den nan plataformanan lokal i alabes via di nan ret mundial purba interkambiá konosementu, eksperensia i ideanan inovativo di negoshi.
Último añanan Fundashon Negoshi Pikiña (FNP), banda di su aktividatnan pa krea e sentido empresarial serka hóbennan, via programanan den kuríkulo di skolnan, a haña e lisensia di Global Entrepreneurship Network mundial pa duna kontenido na e Siman Empresarial na Kòrsou. Aña pasá FNP a organisá GEWCuraçao i a risibí pa esaki reakshonnan masha positivo di e organisashon mama. Den publikashonnan ku a saka, a kategorisá e GEWCuraçao komo un di mihónan ku un filial a organisá su promé aña.
E aña aki un biaha masha un tim di hende ku pashon pa hiba nos mundu empresarial na nivelnan mas haltu, a hinka un programa hopi interesante den otro pa e GEWCuraçao pa aña 2016.
Durante di e presentashon, ku a tuma lugá den ouditorio di Kámara di Komèrsio, sra. Elgenia Pieternella, kende ta presidente di GEWCuraçao a elaborá riba e desaroyo di último dos aña ku a inkluí entre otro un kolaborashon ku GEWBonaire kaminda tambe ta organisá aktividatnan durante e siman.
E informashon sentral tabata e programa di aktividat pa e siman di 14 pa 20 di Novèmber próksimo. Pa e aña aki e organisashon lokal, via di e ret mundial, a bolbe logra trese dos empresario internashonal di un trayektoria profundo i CVnan hopi interesante. Un di nan ta Jeff Hoffman, kende lo ta e ‘keynote speaker’ durante un almuerso djamars 15 di Novèmber, den e sala Atrium di Banko Sentral di Kòrsou i Sint Maarten. E almuerso lo mester generá fondo pa kubri, por parte, gastunan di e organisashon. Banda di e ‘fundraising lunch’, tin diferente workshop ku ta grátis. E otro charla lo ta na enkargo di sra. Thaninga Shope-Linney kende aktualmente ta embahador pa Sur Afrika na Colombia i Venezuela. E charla di sra. Shope-Linney lo tuma lugá djaluna anochi durante e evento di apertura pa un grupo di invitado.
Riba e atardi di rueda di prensa tabatin presente alabes algun fasilitadó di e workshopnan, manera Dennis Dare di Kámara di Komèrsio, Rejauna Rojer i Leatitia Wall, di Dutch Caribean Economists i Lisandro Ignacio kende lo elaborá riba Spiritual Entrepreneurship komo kick-off di e workshopnan. Tambe tabatin representantenan di algun patrosinadó presente manera Mariëlla Olaria-Maduro di Ministerio di Desaroyo Ekonómiko. Un persona mas ku a hiba palabra tabata Edsel Pieternella di GEWBonaire kende a elaborá riba e aktividatnan ku lo tuma lugá na Boneiru.
Durante di e siman tin programá alabes un evento durante kua lo duna sertifikado na mas di 1000 alumno di diferente nivel di estudio ku a sigui ku éksito e programa di Fundashon Negoshi Pikiña. Tin mas aktividat naturalmente i e tim organisadó ku orguyo a mustra e website di GEWCuracao kaminda por wak e programa kompletu i tambe e CV di e dos oradónan internashonal.
E organisashon a informá ku mester registrá online via di e website http://www.gewcuracao.com.. Riba e formulario digital mester informá si ta akudí na e ‘fundraising lunch’ i kua ta e workshopnan den lo partisipá aden.
Mas aleu riba e página di Facebook di GEWCuracao por keda al tantu di tur desaroyo previo na durante i despues di Global Entrepreneurship Week 2016
_mg_5154

_mg_5176

_mg_5182

_mg_5186

_mg_5189

_mg_5200

_mg_5203

img_5208

img_5213

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: