Aqualectra kuminsá ku ponementu di e dekorashon di Pasku Fiesta di Lus i ta hasi un apelashon na komunidat pa kuida e dekorashon di Pasku Fiesta di Lus 2016

November 10, 2016 REDAKSHON 0 Comments

_________________________________________________
Manera tur aña a bira e tradishon, a kuminsá ku ponementu di e dekorashon di “Pasku Fiesta di Lus”. E aña aki atrobe Ministerio di VVRP a enkargá Aqualectra i ku dekorashon den sentro di siudat i tambe algun ròtònde.

Pa e aña aki, meskos ku aña pasá Aqualectra tin un estrecho kolaborashon ku KARA Productions N.V. bou di guia di sr. Giovany Abbath huntu ku téknikonan di Aqualectra a yega na e diseño pa e aña aki. Produkshon di e dekorashon i e obra di man ta komplétamente lokal. Tambe a reubiká algun di e dekorashon di añanan anterior na otro sitio. Di e forma aki a bin ta amplia e sitionan ku por dekorá i krea un variashon den diferente aria. Pa e aña aki, lo pone e dekorashon nobo den sentro di siudat tantu na Punda i Otrobanda i rònt Waaigat i e otro dekorashon lo bin na e siguiente sitionan:

– Punda, Wilhelminaplein, Waaigat, Gouvernementsplein

– Otrabanda, rotònde Lucina Da Gomez, rotònde Ergilio Hato

– Viaduct Otrobanda, Brug di Ponton , Brionplein, Pater Euwensweg te Rector Zwijssenstraat

– Krusada F.D. Rooseveltweg, Jan Noorduynweg i Winston Churchillweg

– Caracasbaaiweg te rotònde Janwe, rotònde Sehos, rotònde Zuikertuintje

rotònde Zegu

E material ku ta uza ta konsistí di : 22 mil meter di lus di pasku,6mil meter di bara di aluminio, 3mil meter di kabel,600 spòtlait,1900 meter kuadrá di tela,30.mil tyraps,

575 meter kuadrá di palu,150 galòn di líkido di faiber,600 meter kuadrá di tela di faiber.

125 galòn di fèrf, 85 galòn di leim blanku,25 galòn di bisonkit,12 saku di pego,50 saku di semènt,1350 meter di bara di heru, 100 meter kúbiko di foam,150 bleki di foam na bòter

99 korant. Ademas a hasi uzo di 5 komprèsor di airu,185 kuashi, 25 zagblet,11trapi,7 vehíkulo pa transporte pisá , 2 kraantruk. I pa traha tur e dekorashon mester di un espasio di 1500 meter kuadrá. Tur esaki tin su gastu mará na dje i tin un presupuesto total ta Nafl.900.000,-. Pa por logra e presupuesto aki e proyekto ta konta ku e spònsernan di tur aña ku ta Gobièrnu di Kòrsou (Ministerio di VVRP), Aqualectra N.V., Curacao Tourism Board, Curoil N.V.

Ademas ta buskando mas patrosinadó, komo ku e aña aki,e kostonan ta mas haltu ku añanan anterior debí na e embergadura i realse mas grandi ku ta bai duna na e dekorashon pa e aña aki. Kualkier kompania ku kier spònser por tuma kontakto via mail na sbikker@aqualectra.com òf yama 4625968.

Ta plania pa sende e lusnan den sentro di siudat i e rotòndenan dia 24 Novèmber próksimo. E lusnan lo keda sende te ku dia 6 di yanüari 2017.

For di djasabra último a kuminsá ku ponementu di e dekorashon na rotònde di Zegu i otro rotòndenan. Aqualectra ta spera ku e dekorashon dje aña aki tambe lo trese e ambiente di Pasku deseá i ku un i tur disfrutá di esaki . P’esei ta invitá komunidat kompleto pa sende lus di fin di aña dekorá pafó di kas òf negoshi ku lus, manera a bira un kustumber den nos pais. Esaki sigur lo krea un impakto positivo riba hinter komunidat den fin di aña asina nos komunidat kompleto drenta den e ambiente di lus i pas. E ambiente di lus kombiná ku tur aktividat di fin di aña lo ta un balor agregá pa aktividatnan den komersio, trese distraishon familiar di nos pueblo i pa koroná obra: krea un atrakshon adishonal na nos produkto turístiko

Éksito di “Pasku Fiesta di Lus”ta den man di kada un di nos, pues ban sigui rebibá sendementu di lus riba nos isla manera a kuminsá algun aña pasá p’asina nos pais por drenta un aña nobo ku hopi lus i positivismo.

For di awor aki ta hasi un apelashon serio riba komunidat pa kuida e dekorashon. E fiesta di Pasku, ta un fiesta di nos tur i e dekorashon tambe di nos tur. P’esei tambe e apelashon pa asina mira un persona hasi algu ku e dekorashon, ku no ta korekto pa atendé esaki mesora i informá outoridat