DUANA KU MANEHO NOBO I USO OPTIMAL DI WEBSITE
DUANA KU MANEHO NOBO I USO OPTIMAL DI WEBSITE
Willemstad – Duana a introdusí algun maneho i prosedura pa funshoná ku ménos papel i ta mas dirigí riba kliente, esta mas fásil, lihé i efektivo. Otro siman djamars Duana Kòrsou ta lansa su website nobo. E website ta brinda banda di duna informashon general di Duana su ròl, maneho i tarea, posibilidat pa hasi tur petishon Online. Relashoná ku e desaroyonan positivo aki ku ta na benefisio di tur kliente di Duana i komunidat, lo inisiá un kampaña di informashon pa promové uso optimal di e fasilidatnan ku e website ta brinda.
Parti di e kampaña aki ta un presentashon na deklarantenan di karga, esta e asina yamá “Expediteurs i aangevers”. E presentashon ta tuma lugá djamars, 15 di novèmber, di 9’or pa 11’or di mainta na WTC. Un invitashon a bai pa tur kliente via e mail communicatie.douane@minfin.cw. Tambe por sigui e informashonnan via medionan di komunikashon tantu skibí komo oudio visual.
Durante su presentashon Hefe di Duana, señor Jules Ilario lo elaborá riba e diferente kambionan ku a tuma lugá kaba i esnan ku pronto lo drenta na vigor. Na final di su presentashon lo tin un pènel ku lo kontestá tur pregunta. E pènel ta konsistí di ekspertonan riba e diferente disiplina i manehonan ku lo presentá,
Lo trata entre otro aspektonan ku tin di haber ku dispensashon, maneho nobo di number di crib pa individualnan ku ta importá produktonan i di karga partikular pa partikular, deklarashon via e sistema Asycuda di Duana, tarifa di importashon, komishon di tarifa, training i sertifikashon di Deklarante di Duana i tur petishonnan ku mester hasi online.
Duana ta hasi un supliká na tur deklarante pa akudí na e presentashon aki, ku ta esensial pa un mihó funshonamentu di e servisionan ku nan ta duna nan klientenan.
Kompanianan ku pa un motibu òf otro no a risibí e invitashon òf ku e adrès di mail por a kambia i Duana no ta altura di esaki òf e adrès no ta konosí na Duana por konsiderá esaki komo un invitashon personal. Por manda un mail tambe pa communicatie.douane@minfin.cw pa por inkluí e adrès den e data di klientenan.
