Minister Suzy Camelia Römer huntu ku Meteo i Obra Públiko ta informá: Areanan sera pa tráfiko pa motibu di inundashon
Areanan sera pa tráfiko pa motibu di inundashon
Willemstad – Servisio Meteorológiko Kórsou a emití un boletin speshal pa alerta di awaseru, bos i welek speshalmente pa e área di Banda Bou. Tin hopi awa ta kai i esaki a kousa inundashon den sierto área manera Pannekoek, Bou Barber, Kloof i otro nan.
Servisio pa Obra Públiko ta informá ku tin diferente área ku ta será pa tráfiko. Kloof ta mitar será. E via pa bai p’abou ta habrí i e via pa bai p’ariba ta sera nèt na e krusada pa bai Soemboe. Dilanti di Misa di Barber tambe ta sera. Bou barber, Sta Cruz, Pannekoek i Lagun tambe ta será pa tráfiko.
Ta pidi outomobilistanan pa tene kuenta ku e kambionan aki. Tambe ta konsehá pa evitá di bai e área di Banda Bou mas tantu posibel. Tambe ta konsehá tur habitante di e bario pa tuma medidanan nesesario pa protehá nan bida i di nan famia na promé lugá i nan propiedat na di dos lugá.
Algun medida di prekoushon:
– Mara ophetonan ku ta lòs pafó i pone bo mes i bo bestianan di kas den seguridat
– No usa un depósito chikitu ni palunan aislá pa skonde.
– No pasa dor di kayanan òf áreanan inundá, kaminda awa ta kuri.
– Sali for di boto i alehá bo mes for di awa, si esei ta posibel.
– Saka stèker di aparatonan elektróniko afó i no hasi uso di esakinan durante di un evento di welek ku bos. Usa telefon solamente den kaso di emergensia.
Áwaseru fuerte ku por kousa inundashon i/òf derumbe di tera i baranka den sierto parti di e isla. Bientu fuerte ku por pone ophetonan lòs bira un proyektil. Área bou di e nubianan di welek ku bos por ser kompañá pa bahamentu fuerte di aire. E bientu fuerte aki por kousa lokalmente sierto destrukshon riba su ruta.
Si bo kas ta yenando ku awa yama Polis 911 òf Brandweer 462-4300. Pa problema ku dam òf roi por yama 521-7800.
