Orashon djaluna 5 di desèmber 2016

Orashon djaluna 5 di desèmber 2016

Laga desierto i tera seku alegrá, mondi bira kontentu i floresé, lag’é tapa su mes ku anglo, hubilá tur ku tin i dal gritu di alegria. E ta bira poderoso manera seru di Libanon, presioso manera Karmel i sabana di Sharon. Israel lo mira SEÑOR, esun ku ta nos Dios, den tur su gloria i splendor. Yena mannan slap ku forsa, laga rudianan tembloroso bolbe bira fuerte. Hinka ánimo den kurasonnan anshá, bisa nan: ‘No tene miedu, boso Dios ta biniendo; E ta bin venga boso i kobra boso enemigunan tur maldat ku nan a hasi boso. E mes ta bin libra boso.’ E ora ei wowo di siegu lo bolbe habri i orea di surdu lo no ta tapá mas. Hende koho lo bula manera biná, lenga di muda lo grita di legria. Den desierto awa lo bini ariba, riunan lo brota fo’i tera seku. Santu kayente lo bira un tanki, tera mort’i set lo yena ku fuente. Kaminda chakal tabatin su kueba, ei yerba, kaña i kabana lo krese. Lo bini un kaminda hanchu, ku nan lo yama Kaminda Santu. Ningun impuru lo no pasa riba dje; l’e ta solamente pa esnan ku ta sigui e Kaminda di Dios. Hende dònferstan lo no kana dualu ei riba. Leon bo no ta haña ei, bestia feros no tin kamind’i pasa, ni topa bo n’ ta topa ku nan. Solamente esnan salbá ta pasa riba e kaminda ei. Esnan ku SEÑOR a reskatá ta bini Sion hubilando. Un alegria sin fin ta pone nan kara bria, un goso sin midí ta poderá di nan. Tur pena i kehamentu ta disparsé pa semper.
Isaías 35:1‭-‬10 

This site uses Akismet to reduce spam. Learn how your comment data is processed.

error: Content is protected !!
%d bloggers like this: