Un fuente di informacion y inspiracion.

Un fuente di informacion y inspiracion.

Fuente ta un plataforma cu ta duna espacio pa comparti informacion over di Aruba, pa propone solucion y presenta idea nan. E contenido riba e website di Fuente ta basa riba hecho y ta semper constructivo. Fuente no ta afilia na ningun partido politico. E focus di Fuente ta e bienestar di nos isla. Tur hende por contribui. Fuente a cuminsa ora nos a bin hunto cu un grupo di studiante y young professionals Arubiano na Hulanda pa delibera tocante kico nos por contribui na Aruba. Nos a topa un paar di biaha pa delibera y intercambia ideanan. Cada un di nos tabata tin diferente pensamento y diferente motibo pa kier a cuminsa cu un plataforma asina. Nos tur si tabata di acuerdo cu no tin un plataforma asina na Aruba ainda. Tambe por a wak riba social media cu hopi otro Arubianonan tin e mesun preocupacionnan cu nos. Un di metanan di e plataforma Fuente ta pa trece mas transparencia y tambe motiva e pueblo pa pensa hunto y bin cu solucionnan y ideanan pa mehora nos isla. Por ehempel, studiantenan di ley por investiga con e ley di abuso di menor na Aruba ta hinca den otro y con e por wordo cambia. Esaki nan lo por comparti riba Fuente den e forma di un articulo. Hopi studiante a yega di investiga caba diferente topico of problemanan na Aruba, por ehempel pa nan thesis. Nan lo por traha un resumen di dje pa comparti riba Fuente. Un otro meta di Fuente ta pa stimula discusion y intercambio di opinion a base di hechonan. Nos kier pa e personanan cu lesa e articulonan cu ta poni riba e plataforma ta critico y pensa si nan ta di acuerdo of no cu loke ta wordo skibi y tambe dicon. Comparti tambe cu e plataforma si bo ta pensa bo tin un miho idea of si bo tin informacion adicional cu no ta poni den e articulo. Tur contribucion constructivo ta yuda. Fuente ta un comunidad y e mester e aporte di pueblo di Aruba y tur hende cu stima Aruba pa e por funciona. Asina ta studiantenan, profesionalnan y henter Aruba ban uni pa haci informacion mas accesibel pa asina nos tur por yuda hiba nos isla pa dilanti.

Nos kier invita tur hende pa bishita e plataforma Fuente via nosfuente.org cu lo wordo lansa riba 15 december 2016.

Bo kier mas informacion of kier contribui na Fuente?

Bishita nos: nosfuente.org Like nos riba
Facebook: facebook.com/nosfuente

This site uses Akismet to reduce spam. Learn how your comment data is processed.

error: Content is protected !!
%d bloggers like this: