Kurpa di defuntu Kurasoleño den beslag na Colombia

Kurpa di defuntu Kurasoleño den beslag na Colombia
Viktima di un aksidente ku a tuma lugá aki na Kòrsou, na luna di òktober, mester a keda transportá pa Colombia ku Air Ambulance. Lamentablemente e viktima a fayesé a konsekuensia di heridanan ku el a risibí. Komo ku e viktima no tabata den poseshon di un paspoort balido, el a drenta Colombia ku un dokumentu di emergensia, un asina yamá laissez passer. E heridanan ku el a sufri tabata hopi severo i Medicina Legal, a tuma e kurpa den beslag despues ku e viktima a fayesé. Banko di Seguro Sosial ta haciendo tur esfuerso pa pone un fin na e situashon aki di manera ku e defuntu por yega Kòrsou i risibí un entiero digno. Medicina Legal ta outoridat na Colombia ku ta atendé ku tur kaso di fatalidat den mundu di medisina i kuido. Famianan di e defuntu a trata di atendé e kaso aki na Colombia pero nan no a logra. Riba òrdu di outoridatnan Colombiano un subrina di e defuntu a hasi un tèst di DNA pa establesé ku e ta famia di e defuntu. Sinembargo e resultado tabata un ‘mismatch’.

Banko di Seguro Sosial a hasi un petishon na Embahada di Reino na Bogota, loke tampoko a duna resultado. Komo ultimo rekurso ta trata pa outoridatnan Colombiano manda nan personal Kòrsou pa hasi tèst di DNA riba famianan di e defuntu pa por entregá e kurpa na famianan.