Komunikado relashoná ku periodo di sr. H. Davelaar komo Presidente di Parlamento

parlameto-di-korsou-staten-logo-2

Dia 2 di novèmber 2016, den e promé Reunion Públiko di Parlamento pa e periodo 2016-2020, Parlamento a skohe sr. Humphrey Davelaar komo Presidente di Parlamento. Sr. Davelaar a asumí e reto den un temporada den kua ainda e trayekto pa formashon di un Gobièrnu no a keda konkluí. Apesar di esei e promé periodo di e aña Parlamentario tras di lomba por keda kualifiká komo un periodo sumamente produktivo den kua Parlamento por wak bèk riba vários logronan.

Parlamento a bini huntu den vários reunion:
 7 Reunion Públiko
 5 reunion di Komishon Sentral
 5 reunion di komishon fiho
 1 senioren convent
 4 reunion informal

Den e reunionnan aki Parlamento a tuma desishonnan importante pa e komunidat di Kòrsou. Den e kuadro aki por menshoná por ehèmpel un kantidat di 4 konsepto di Lei nobo ku a keda trata promé bes den Komishon Sentral di Parlamento, siguí pa un relato riba e konseptonan ei pa Gobièrnu. Mas aleu Parlamento a aprobá 9 Lei den Reunion Públiko. Hopi di e Leinan aki lo tin un impakto sosial-ekonómiko grandi riba nos komunidat. Ehèmpelnan di esaki ta e Lei pa revisá EOP den kuadro di Oostpunt i diferente Lei fiskal na fabor di desaroyo ekonómiko. Resientemente Parlamento a aprobá e Lei mayó di nos finansa públiko ku ta e Presupuesto pa aña 2017.
Tambe Parlamento a ekspresá su mes den vários moshon dirigí na Gobièrnu.

En bista di tur esakinan, ta na su lugá pa konkluí ku e último dos lunanan ta bai den historia komo ehèmpel di trabou duru i logronan konkreto di Parlamento bou di guia i direkshon di sr. Davelaar komo Presidente.

Sr. Davelaar ta gradesí personal di Grefi, Gobièrnu di Kòrsou, órganonan di konsulta, medionan di komunikashon i pueblo di Kòrsou en general pa e aporte i sosten duná na Parlamento di Kòrsou den e periodo ariba menshoná.
Sr. Davelaar ta deseá pueblo di Kòrsou en general felis dianan di fiesta i un aña nobo yená ku dicha i prosperidat.

This site uses Akismet to reduce spam. Learn how your comment data is processed.

%d bloggers like this: