Kòrsou no ta den un situashon inkonstitushonal

GOBIERNU DI KORSOU 2682016

Kòrsou no ta den un situashon inkonstitushonal

Den e último dianan aki gobièrnu a tuma nota ku bou di poblashon i den medionan sosial ta reina un pensamentu komo si fuera tin kos robes a tuma lugá òf ta tumando lugá, en torno di huramentu di ministernan òf en torno di tumamentu di retiro komo miembronan di Parlamento. Tambe ta reina e idea ku pais Kòrsou lo ta den un situashon inkonstitushonal, komo ku na e momentu aki ta solamente 14 persona ta miembro di Parlamento.

Gobièrnu ta rekonosé ku no a sinkronisá e huramentu di minister nobonan na un banda i tumamentu di retiro dor di shete miembro di Parlamento na otro banda. Esaki lamentablemente a duna espasio pa spekulashon i a keda usá komo argumentu pa krea intrankilidat bou di nos pueblo. Nos ta sigurá un i tur ku asina resès terminá, e miembronan nobo di Parlamento lo por kaba e proseso di aprobashon di kredensial, huramentá i kuminsá ehersé nan trabou komo representante di pueblo.

Dia 23 di desèmber último, manera ta konosí, ministernan di e gabinete Koeiman, despues di elekshonnan di 5 di òktober 2016, a huramentá dilanti su Ekselensia sra. Gobernador, pa asina Kòrsou por a dispone di un gobièrnu nobo. Algun momentu promé ku e seremonia aki, 7 miembro di Parlamento, basá riba e stipulashon den artíkulo 45 di nos Areglo di Estado, a entregá nan retiro komo tal.

Parlamento, konforme Kiesreglement, a pone entre otro Konseho Supremo Elektoral na altura di e vakaturanan den Parlamento, pa asina, segun reglanan stipulá den nos Kiesreglement, e tramitenan pa deklará miembronan nobo, kuminsá kana nan kaminda.
Entretantu gobièrnu tin entendí ku kredensialnan di e 7 personanan ku tin ku remplasá esnan ku a tuma retiru i bira miembro ya kaba ta den man di Parlamento. Pues na e momentunan aki, basá riba kustumbernan parlamentario, lo mester tuma lugá un reunion públiko di Parlamento pa investigá e kredensialnan i informá tantu sra. Gobernador komo e 7 personanan ku tur kos ta na òrdu pa nan huramentá dilanti sra. Gobernador, pa asina nan asumí nan responsabilidat komo miembro di Parlamento. Na e momentu ei Parlamento ta konsistí atrobe di 21 miembro.

Gobièrnu kier informá pueblo di Kòrsou ku no tin ningun motibu pa kere ku tin un situashon robes den nos pais, te pa hasta kere ku nos ta bibando i gobernando bou di sirkunstansianan inkonstitushonal. Den e proseso ku a kuminsá 23 di desèmber último yegando te ku awe, tur regla di nos Areglo di Estado, tur regla di nos Kiesreglement i di Reglamentu di Òrden di Parlamento a ser respetá i a ser tumá debidamente na kuenta.
Huramentashon di ministernan i tumamentu di retiro komo miembro di Parlamento ta kosnan ku ta tuma lugá regularmente den nos sistema di gobernashon i kaminda te ku awe tur kos a i ta kana normal.

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: