DISKURSO NASHONAL DI PROMÉ MINISTER SR. HENSLEY KOEIMAN

Kòrsou, 1 di yanüari 2017

DISKURSO NASHONAL DI PROMÉ MINISTER SR. HENSLEY KOEIMAN

Kerido Pueblo di Kòrsou, Pa mi ta un gran honor i privilegio ku mi por trese e mensahe aki di Gobièrnu di Kòrsou pa nos pueblo, na honor di klousura di aña 2016 i inisio di aña 2017.

Na momentunan asina aki semper ta bon pa para ketu i reflekshoná riba e aa ku ta tras di lomba.

Pa hopi hende e aña no a bai manera nan a deseo òf spera. Esei hopi biaha ta pasobra nan no a plañia nan deseo i metanan. Na sa bisa “si bo faya di plañia, bo ta planiando pa faya” Te hasta ora bo plañia bo ta haña bo hopi biaha ta ahustá komo ku susesonan fuera di bo kòntrol ta pone ku bo tin ku ahustá, pesei semper mester hinka sierto fleksibilidat den planifikashon.

Ban kompromete nos mes pa reflekshoná kon 2016 a bai i basa riba esei plañia 2017, hasi esaki mas tantu posibel den konkordansia ku bo sernan kerí. Di mes tin ku plañia tambe pa ku bo trabou i otro responsabilidatnan sosial.

Den 2016 tin di nos hendenan ku a namorá, kasa, haña yu, slag, promové, kumpra kas, triunfá den deporte, músika, arte, pero tambe tin ku a pèrdè un famia òf otro ser kerí. Pabien na esnan ku tabatin motibu pa selebrá i hopi forsa na esnan ku mester a karga ku perdidanan sensibel. Asina bida ta i nada lo no kambia den esei. Sòru semper si pa bo duna atenshon nan bo sernan kerí i laga nan sa ku bo stimanan i ku nan por konta ku bo. Hasi esei pa no duel bo despues.

Kerido pueblo, E aña ku a pasa tabatin varios desaroyo no agradabel manera, instabilidat kontinuo na mediano oriente i e guera na Siria. Un aña den kua mundu a konosé kambionan grandi manera Brexit na Inglatera i elekshon di Donald Trump na Estados Unidos. Akontesimentunan ku lo kambia rumbo di mundu den e añanan benidero. Mas serka di kas e desaroyonan na Venezuela tin su impakto riba ekonomia di nos Pais, muy en espeshal pa ku turismo.

Di otro banda e akuerdo di pas na Colombia, despues di un guera interno di mas ku mei siglo i konsolidashon di demokrasia na Haiti, ta duna nos speransa pa mas stabilidat i prosperidat den nos region.

Lastimanente na Kòrsou mes nos no a konosé kresementu ekonómiko den 2016, esei sigur lo ta un reto pa nos pueblo, huntu ku otro retonan grandi riba entre otro tereno moral, sosial, ekonómiko, salubridat, infrastruktura, enseñansa i di siguridat.

Pa loke ta trata moral mester para e degenerashon di norma i balornan den nos komunidat.

Kerido Pueblo, E manera ku nos ta atendé ku otro lo mester kambia di konfrontashon pa dialogo, di individualismo pa solidaridad, di menospresio pa rèspèt. Mester trese bèk e dignidat humano den nos komunidat. Dignidat humano mester bira sentral. Lidernan riba tur tereno, mester ta un ehèmpel den esaki.

Sosial nos lo mester traha riba un komunidat den kual ta eradiká pobresa, soledat i eksklushon. Mester por funda famianan na unda ta reina harmonia, trankilidat i pas. Desaroyá barionan ku riba nan turno ta un gran famia, den kua tur hende ta sinti inklushon i ku nan ta konta i esaki outomatikamente lo trese kun’é ku nan tei kuida otro. Mester inbertí den infrastruktura di barionan i tambe den organisashonnan di barrio.

Ekonómikamente mester hasi máksimo esfuerso pa krea kuponan di trabou honrado pa esnan ku ta para na margen di sosiedat. Nos mester traha duru pa kria nos mes i nos famia i kontribuí segun forsa na adelanto di nos Pais . Tambe lo mester hasi mas na agrikultura, krio di bestia i peska i nos mester organisá nos mes mas den koperativanan pa di e forma aki mas i mas tuma destino den nos mes man. Kòrsou mester di un ekonomia duradero, diversifiká i stabil.

Nos forsa laboral mester ser protehá pa leinan laboral adekuá ku ta ser vigilá ku kòntròlnan efektivo pa garantisá progreso pa tantu dunadó di trabou komo e trahadonan.

Nos salubridat públiko lo bai haña hopi atenshon, kaminda lo duna atenshon pe parti di prevenshon, nos hendenan mester kome balansá biba salu, entre otro mester move mas tantu. Serka nos tambe ta konta ku ta mihó prevení ku kura.

Nos enseñansa mester siribi nos komunidat i krea siudadanonan kulto ku por hasi e trabounan di futuro. Pesei nos mester bin ku eseñansa diseñá pa kumpli ku nos nesesidatnan, basa riba nos realidat. Un enseñansa kaminda ta desaroyá talento natural di e hóben i no ta sigui konsentrá solamente riba e parti kognitivo. E parti kreativo tambe mester haña e atenshon nesesario.

Pa loke ta hustisia mester trese bèk e Kòrsou den kual tur hende ta sinti nan mes seif, sigur i por desaroyá nan bida sin miedo. Mester frena kriminalidat di un forma efektivo i akinan tambe prevenshon ta sumamente importante. Sigur mester atende ku e fenomeno di atrako ku ta laga hopi hende troumatisá pa largu tempu.

Pa logra esakinan nos mester kobra impuesto di un forma efektivo i sòru pa tur hende kumpli ku nan obligashon finansiero ku Kòrsou. Tambe mester sòru pa un bon servisio tantu na nos pueblo komo na potensial invershonistanan. Pesei nos mester di un kuerpo di amtenar bon prepará, apresiá i movitá.

Kerido pueblo, Pa nos Gobièrnu boluntarionan ta inpagabel i meresé tur honor i rèspèt pa nan gran kontribushon den entre otro deporte, kultura, arte, kanto, baile, patvinderij, otro trabounan den bario etc.

E Gobièrnu aki a tuma riba su mes den e Akuerdo di Gobernashon pa enfrentá e retonan aki, pero no por hasi esaki sin koperashon di kada un di nos ku ta biba riba e baranka aki. Mester trese konfiansa bèk den nos mes, nos isla i nos futuro. Esaki, huntu ku trabou duru i sakrifisio lo trese bèk e Kòrsou manera kanta den nos Himno i simbolisá dor di nos Bandera.

E aña ku a transkurí ta tin elekshonnan pa un Parlamento nobo. E proseso aki a konsolidá nos demokrasia, pero a mustra tambe ku pueblo di Kòrsou ta hopi dividí. Nos mester uni mas si nos kier logra ku nos Pais ta bai dilanti.

Komo Promé Minister di e Pais aki mi ta tuma riba mi mes e responsabilidat di tur loke por a bai mihó durante e proseso aki i ta primintí pueblo humildemente ku mi lo hasi mi máksimo esfuerso pa sigui reinforsá nos demokrasia.

Mi kier invitá pueblo pa sera un kompromiso ku Gobièrnu pa nos tur, grandi i chiki, muhe i hòmber, studiante i penshonado, lanta para i tuma e responsabildat di nos destino den nos man. Ban para skouder na skouder, uní pa nos bai den e mesun direkshon, esun di union, rèspèt i konfiansa, di trabou duru na bienestar di nos mes, nos yunan i nietonan, pa amor di nos Pais i di e mundu.

Ban drenta e aña nobo bèk ku ánimo i ku fé den Dios ku si en berdat nos ta ruman di otro nos lo tene kuenta ku otro i duna kada ken e posibilidat pa por kumpli ku su nesesidatnan.

Pues laga awe na e kambio di aña aki ta un momento históriko den desaroyo di nos Pais. E momentu kaminda krisis, konfrontashon i adversidat ta traha lugar pa speransa, union i desaroyo di virtutnan i elevashon di e dignidat di nos hendenan. Laga e gran logro di nos hendenan riba varios tereno motivá i inspirá nos pa ban pa ekselensia. Kòrsou tin hopi potensial, ta na nos pa hasi uso di esakinan.

Kompatriotanan ku ta biba den eksterior bosonan tambe ta den nos mente i nos ta konta ku bosnan aporte tambe.

Abo, hóben, mayor, dosente, lider, trainer, ruman, yu, kasa, amigu, kolega, obrero, bisina … Kòrsou ta konta ku bo, ban pe!!!!!

Pueblo di Kòrsou, na nòmber di Gobièrnu di Krsoou mi ta deseaá bo un aña 2017 bendishoná, kolma ku amor i felisidat.
Hensley F. Koeiman

SIGUI NOS VIA NOS FACEBOOK PAGE, DIJS KLIK RIBA E LINK I FOLLOW NOS: https://www.facebook.com/Kiko-Ta-Pasando-Notisia-pagina-542850012445607/

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: