Parlamentario Eduard Braam ta di opinion ku a mester atendé ku e situashon di koriente na Kòrsou den staten.

Aqualectra, 11 jan 2017

Parlamentario Eduard Braam ta di opinion ku a mester atendé ku e situashon di koriente na Kòrsou den staten. Paso no por ta asina ku tur dia klientenan di Aqualectra ta bira víktima di e kompania nashonal ku mester sòru pa kasnan tin awa i koriente den un forma optimal i responsabel. Braam ta kere ku mester papia ku minister enkargá ku energia kende ta sr. Kenneth Gijsbertha tokante di e situashon aki i wak kiko e problema prinsipal ta, pa asina buska un solushon pa e situashon aki den un término kòrtiku.
Ta konosí ku gobièrnu ta den proseso di negosiashon ku e kompania GZE pa loke ta trata nos sistema di energia na Kòrsou, pues nos no por papia di término largu, sino término kòrtiku. Loke si mester sa ta, si e intenshon ta pa GZE krea energia kontinuo i na un preis mas ekonómiko pa e pueblo.
Kòrsou mester kuminsá eksigí kalidat di su kompanianan i Aqualectra ta un di nan. Mester wak kiko e problema real ta i pa atendé ku esaki debidamente i si e problema real ta Aqualectra òf CRU (antes BOO) mester atendé ku esaki. Braam ta mustra riba e echo ku miéntras no tin ningun alternativa konkreto pa remplasá CRU mester sòru pa tin ‘back up’ pa nos sistema di energia.
Banda di esaki mester remarká ku e komunikado ku a keda saka pa CRU ta hasi e situashon aun mas kompliká, ya ku CRU ta mustra ku nan ta dunando nos kompania di utilidat e kapasidat palabra. Nos por a tuma nota ku e minister enkarga ku energia a bishita Aqualectra pero no a splika nada konkreto na komunidat.
Lesando e komunikadonan i splikando esakinan tin vários pregunta ku ta bini dilanti manera:
– For di ki tempu BOO no por kumpli ku Aqualectra manera tin palabra?
– Aqualectra tin akshon den CRU igual ku e tabatin ántes di CUC?
– CRU a tuma e kontrakt ku tabatin entre Aqualectra I CUC over? Kua kontrakt a tuma over i dikon si òf no?
– Pueblo mester haña sa kiko ta e kapasidat total ku Aqualectra tin pa suministrá koriente i kiko ta e kapasidat eksakto ku e mester haña serka CRU.
– Si no tin un kontrakt entre Aqualectra i CRU pa suministrá koriente, kon Aqualectra por informá ku CRU no ta suministrá sufisiente koriente na nan?
– Tin relashon hurídiko entre e dos partidonan aki? Kiko eksaktamente ta e relashon hurídiko entre e dos partidonan aki ta?
– Konta ku e “levensduur” di e mashinnan ku CRU i Aqualectra tin aktualmente. Pa kon largu nos por konta ku nan servisio?

Braam ta di opinion ku parlamento mester haña informashon konkreto riba kiko ta pasando pero aun mas kiko ta bai hasi pa remediá e situashon aki riba korto plaso.
Kòrsou ta un pais ku su energia ya ta kostoso kual ta pone ku invershonistanan ta pensa dos bes promé ku nan bin invertí na Kòrsou loke ta hinka ekonomia di nos pais den un situashon mas delikado.
Al final Braam ta urgi minister enkargá ku e kartera di energia tuma inisiativa i pidi sosten na parlamento pa huntu yega na solushon konkreto pa pueblo konsumidó.

5f2f8541-23f2-42d0-b733-03c70cf81cef-1

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: