Situashon entre CRU i Aqualectra
Situashon entre CRU i Aqualectra
Segun CRU (Curaçao Refinery Utilities) i RdK (Refineria di Kòrsou) deklarashon di Aqualectra tokante CRU no ta kuadra ku e realidat. For di aña 2012 CRU ta responsabel pa operashon di e planta di BOO. CRU a tuma operashon di e planta over di Aqualectra/Mitsubishi/ Marubeni, riba petishon di Gobiernu di Kòrsou. E planta di BOO no tabata funshoná i konsekuentemente operashon di Refineria Isla a keda seriamente afektá pa aproksimadamente 1 aña, lokual a okashoná un situashon di pèrdida di trabou. Motibu primordial pa CRU a tuma e planta di BOO over tabata pa suministrá produktonan indispensabel pa operashon (awa, koriente i stoom) na Refineria Isla. Di otro banda, CRU tabata suministrá Aqualectra ku e ekseso di produkshon di koriente i di tal forma tabata yuda Aqualectra tene gastunan di koriente abou pa pueblo.
Aqualectra ta referí na un kontrakt entre Aqualectra i CRU i RdK; sinembargo no tin un kontrakt entre e kompanianan aki. For di aña 2012 CRU a suministrá Aqualectra ku koriente pa komunidat sin ku esaki ta reglá pa medio di un kontrakt. CRU a yuda Aqualectra ku suministro di koriente sin risibí pago di Aqualectra pa kubri e gastunan di produkshon. Di su banda Aqualectra a duna di konosé ku e ta paga un montante di 4.3 mion florin na komustibel na CRU via di Refineria Isla. Sinembargo CRU no ta risibí e pago. E montante aki ta kubri solamente 10% di gastunan di produkshon di CRU.
Pues Aqualectra ta paga 20 sèn pa kWh na un kompania ku ta produsí koriente a base di energia di bientu. Aqualectra mes su kosto di produkshon ta 30 sèn pa kWh. Aqualectra ta kobra komunidat entre 48 pa 63 sèn pa kWh. Aqualectra ta konta ku CRU ta sigui suministrá Aqualectra koriente sin risibí pago pa esaki. Ta imposibel pa un kompania produsí sin keda pagá pa esaki.
RdK, ku ta akshonista di CRU a disidí di kontribuí ku kasi 100 mion florin den CRU pa salvaguardiá operashon e kompania te ku fin di aña 2019, di manera ku Refineria Isla por keda suministrá ku koriente, awa i stoom. Refineria Isla por keda operashonal i mantené su trahadónan.
