ACTIVO DOMESTICO NETTO A SUBI Resumen di e Relato Mensual di December 2016

edifisio-banko-central-aruba

ACTIVO DOMESTICO NETTO A SUBI Resumen di e Relato Mensual di December 2016

Desaroyo monetario
Den e luna di December 2016, e cantidad di placa den circulacion a subi cu Afl. 93 miyon te na Afl. 4.166,4 miyon, compara cu e luna anterior. Esaki a wordo causa door di un crecemento den e activo domestico netto (+Afl. 102,4 miyon) y un bahada den e reserva di divisa netto (-Afl. 9,4 miyon).

E desaroyo den e activo domestico netto a surgi door di un subida den credito domestico (+Afl. 98,1 miyon), causa pa un crecemento den credito netto na e sector publico (+Afl. 85,3 miyon) y expansion di credito bancario na e sector priva (+Afl. 12,8 miyon). Tambe, transaccionnan no relata na credito a aumenta cu Afl. 4,3 miyon.

E subida den credito bancario netto na e sector publico ta debi na un bahada den e depositonan di gobierno (-Afl. 95,7 miyon), cual a wordo parcialmente mitiga door di menos debenan di gobierno (-Afl. 10,7 miyon). Crecemento den credito na empresa (+Afl. 10 miyon), credito na consumidor (+Afl. 1,6 miyon) y hipoteca pa vivienda (+Afl. 1,1 miyon) a contribui na e subida den credito bancario na e sector priva. E aumento den transaccionnan no relata na credito a resulta mas tanto for di un expansion den e asina yama “shareholders’ equity” y “accounts receivables and prepayments”.

E bahada den reserva di divisa netto di e sector bancario ta debi na benta netto di divisa (Afl. 213,7 miyon) na publico, principalmente relaciona cu pago netto pa importacion di mercancia, e asina yama “portfolio investment”, otro servicionan y otro inversionnan. Esaki a wordo pa un gran parti mitiga pa compra netto di divisa (Afl. 204,3 miyon) for di publico, primordialmente relaciona cu turismo, transaccionnan di e asina yama “capital account” y transferencia netto for di cuentanan den exterior di companianan local.

Inflacion
E nivel general di prijs, cu ta wordo midi door di e indice di prijs di consumo, a registra un bahada di 0,3 porciento den e luna di December 2016, compara cu December 2015. E contribuyente principal na e caida aki ta e componente “Vivienda”, cual ta debi primordialmente na un reduccion den prijs di electricidad. Si exclui e componentenan di cuminda y energia for di e indice di prijs di consumo, inflacion ta mustra un crecemento di 0,4 porciento compara cu December 2015. Pa loke ta trata e promedio anual di e tasa di inflacion, esaki a keda mescos na -0,9 porciento na December 2016, compara cu November 2016.

Turismo
Na December 2016, e cantidad di turista a registra 97.042 bishitante, cual tabata 18,1 porciento (-21.424 bishitante) menos cu na December 2015. E bahadanan den e mercado Latino Americano di 49,6 porciento (-23.319 bishitante) tabata e causa di esaki. Di otro banda, e mercadonan Norte Americano y Europeo a crece cu 2.685 bishitante (+4,5 porciento) y 1.118 bishitante (+17,8 porciento), respectivamente.
E caida den e mercado Latino Americano a wordo causa pa menos bishitante for di Venezuela (-25.068 bishitante of -62,1 porciento). E subida den e mercado Norte Americano a resulta for di un expansion den bishitante for di Merca (+2.396 bishitante of 4,5 porciento). E crecemento den e mercado Europeo a wordo causa principalmente for di mas bishitante for di Suecia (+425 bishitante of +45,4 porciento) y Hulanda (+379 bishitante of +13,2 porciento).
E cantidad di turista crucero a registra un aumento di 8.935 bishitante of 9,7 porciento te na 100.642 na December 2016, compara cu December 2015. E cantidad di barconan, sinembargo, a baha for di 48 na December 2015 pa 47 na December 2016.
Entrada di Gobierno
Na December 2016, entrada di gobierno a suma Afl. 105,4 miyon, cual ta Afl. 79,4 miyon menos compara cu e mesun luna di e aña anterior. E caida aki ta resultado di bahadanan den entrada di impuesto (-Afl. 62,9 miyon) y den entrada no relata na impuesto (-Afl. 16,6 miyon).
E bahada den entrada di impuesto ta relata principalmente na menos impuesto riba ganashi (-Afl. 79 miyon), despues di e introduccion na November 2015 di e asina yama “Voldoening op Aangifte Syteem (VAS)”, cual a resulta den entrada mas halto di impuesto riba ganashi na December 2015. Di otro banda, subidanan a wordo registra den impuesto riba salario (+Afl. 8,5 miyon), benta di negoshi (B.B.O) (+Afl. 1,7 miyon) y impuesto riba devisa (+Afl. 1,2 million).

Banco Central di Aruba
9 Februari 2o17

This site uses Akismet to reduce spam. Learn how your comment data is processed.

error: Content is protected !!
%d bloggers like this: