Fechanan di importansia relashoná ku elekshon 2017

Fechanan di importansia relashoná ku elekshon 2017

Gobernadó di Kòrsou, pa medio di dekreto gubernamental no. 17/0223 di 12 di febrüari 2017, a stipulá ku riba dia 28 di aprel 2017 tin elekshon pa skohe miembronan pa Parlamento di Kòrsou.

E dekreto gubernamental ta stipulá tambe ku dia 10 di mart 2017 agrupashonnan polítiko por postulá kandidato pa partisipá na elekshon di 28 di aprel 2017.

Konforme Ordenansa di Elekshon (A.B. 2010 no. 87) artíkulo 36, insiso 2, registro di votadónan ta sera 30 dia promé ku e fecha riba kua tin di entregá lista di kandidato. Esaki ta nifiká ku e registro di votadónan a sera dia 8 di febrüari 2017, pues ta solamente e siudadanonan ku riba 8 di febrüari 2017 ta aparesé den e registro di votadónan por tuma parti na elekshon riba 28 di aprel 2017.

Pa por tuma parti na elekshon di 28 di aprel 2017, agrupashonnan polítiko ku entregá un lista di kandidato i ku no ta representá den e Parlamento aktual, mester, konforme artíkulo 16 insiso 1 i 6, sostén di 1% di votonan bálido di elekshon di 5 di òktober 2016 (esta 79.120), ku ta por lo ménos 792 votadó. Pa logra esaki, nan mester partisipá na e proseso di sostenementu di lista ku ta tuma lugá riba djasabra 18 i djadumingu 19 di mart 2017. 

Atentamente,

Presidente Konseho Supremo Elektoral,

Drs. Raymond (Pacheco) Römer.

This site uses Akismet to reduce spam. Learn how your comment data is processed.

error: Content is protected !!
%d bloggers like this: