Orashon djaweps 16 di febrüari 2017

Orashon djaweps 16 di febrüari 2016

Dios a bendishoná Noe i su yu hòmbernan bisando: ‘Yena mundu ku hopi desendiente. Tur bestia na mundu lo tembla di miedu pa boso. Tur bestia den laria, riba tera i den laman lo ta den boso man. Boso mag kome karni di tur bestia meskos ku boso mag kome bèrdura. Tur bestia Mi ta duna boso komo kuminda. Pero tin ún kos ku boso no mag kome: karni ku sanger aden, pasobra ta den e sanger bida ta. Ken ku mata un otro hende, Mi ta pon’é responsabel. Ta kastig’é ku morto. E bestia ku mata un hende tambe mester muri. Esun ku drama sanger di un hende, un otro hende lo drama di dje, pasobra hende ta trahá segun Dios su imágen. I boso, haña hopi yu, yena mundu ku hopi desendiente!’ Dios a bisa Noe ku su yu hòmbernan: ‘Awor Mi ta sera mi aliansa ku boso, ku boso desendientenan, i ku tur e bestianan, ku a sali huntu ku boso for di e arka: para, bestia di kria, bestia di mondi, tur bestia na mundu. Mi ta primintí boso ku nunka mas lo Mi hasi uso di un diluvio pa destruí hende i bestia; lo no bini diluvio mas pa destruí mundu.’ Tambe Dios a bisa: ‘Esaki ta e señal di e aliansa ku Mi ta sera ku boso i ku tur bestia ku ta huntu ku boso, pa tur generashon benidero: Mi ta pone mi regenbog den nubia pa e ta e señal di e aliansa entre Ami i mundu.
Génesis 9:1‭-‬13