Orashon djaluna 20 di febrüari 2017
Orashon djaluna 20 di febrüari 2017
Ora nan a bai serka e otro disipelnan, nan a mira un bòshi di hende pará rònt di nan. Algun dòktor di lei tabata diskutí ku e disipelnan. Asina e hendenan a mira Hesus, nan a keda mashá asombrá i kore bai serka djE pa kumind’É. Hesus a puntra su disipelnan: ‘Ta kiko boso ta diskutí ku nan?’ Un hòmber for di den e multitut a kontestá: ‘Maestro, mi a trese mi yu hòmber pa Bo. Ta asina ku e ta poseé pa un spiritu ku a hasié muda. Kada be ku e spiritu atak’é, e ta lag’é kai djimpi; e mucha ta skuma, morde djente i bira steif. Awor mi a pidi bo disipelnan pa saka e spiritu, ma nan no tabata por.’ E ora ei Hesus a bisa: ‘Esta un generashon sin fe! Ta kuantu tempu mas Mi tin ku keda huntu ku boso? Pa kuantu tempu mas Mi tin ku sigui soportá boso? Trese e mucha pa Mi!’ Nan a bai ku e mucha serka djE. Asina e mal spiritu a mira Hesus, el a pone e mucha kai djimpi. E mucha a kai abou na suela, keda skuma lora bai bini. Hesus a puntra e tata: ‘Kuantu tempu e tin ta hasi asin’akí?’ ‘Fo’i chikí,’ e tata a kontestá. ‘Hopi bia e spiritu a yega di tir’é den kandela i den awa p’e kaba kuné. Si Bo por, tene mizerikòrdia i yuda nos!’ Hesus a kontest’é: ‘Kon bo ke men “si Bo por”? Pa esun ku ta kere nada no ta imposibel.’ Hesus no a kaba di papia, ku e tata a grita: ‘Mi ta kere, yuda mi ku mi falta di fe!’ Ora Hesus a nota ku e hendenan tabata basha bini riba nan, El a skual e spiritu seriamente: ‘Spiritu ku ta hasi hende muda i surdu, Ami ta ordená bo: Sali for di e mucha hòmber akí i no drent’é nunka mas.’ Ku gritamentu i despues di a pone e mucha kai djimpi pisá, e spiritu a bin sali. E mucha a keda manera morto, p’esei hopi hende a bisa: ‘Ata…, el a muri!’ Ma Hesus a kohe su man lant’é i e mucha a lanta para. Ora Hesus a yega kas i tabata so ku su disipelnan, nan a puntr’É ta kon bini nan no por a saka e spiritu for di e mucha hòmber. Hesus a kontestá nan: ‘Ta solamente ku orashon por saka e sorto di spiritu akí for di hende.’
Marko 9:14-29
