Minister Camelia-Römer huntu ku Meteo ta pidi tur hende pa Gosa konsiente den e kayente!

Minister Camelia-Römer huntu ku Meteo ta pidi tur hende pa Gosa konsiente den e kayente!

Willemstad – Minister Camelia-Römer huntu ku Servisio Meteorológiko Kòrsou (Meteo) ta hasi un apelashon na komunidat pa durante di karnaval gosa konsiente mirando e wer di nos isla. Febrüari ta un luna basta kalor. Tur persona ku ta bai gosa di karnaval mester tene kuenta ku esaki i tuma medidanan korespondiente.

Meteo tin un aplikashon (APP) pa telefon selular ku yama ‘Curacao Weather’ riba kual por mira e temperatura di dia i tambe e índise di rayonan di solo. Wer ta kalor, pero tin dia ku esaki por yega sierto ekstremo. Pa e motibu aki, Meteo ta konsehá tur persona, ku tin un telefon selular pa download e APP aki i keda informá. E APP ta disponibel via di App store pa Iphone i Google Play pa telefonnan Andriod.

Ta konsehá tambe pa:
– bebe sufisiente líkido preferiblemente awa (rekomendashon pa dia ta un total di ocho glas di awa òf 2 liter pa un adulto),
– evitá kos di bebe ku hopi suku aden,
– usa protekshon solar,
– usa kosnan pa tapa solo manera pèchi, sombré, parasòl i protehá bo wowo ku brel di solo,
– mucha chikí i hende di edat ta sinti efektonan mas lihé, pues mester ta mas prepará (ku bòter di awa i kos pa tapa solo),
– usando paña kolo kla i di material natural (por ehèmpel katuna) bo ta keda mas fresku,
– si bo no ta sinti bo mes bon, deskansá den fresku mas pronto posibel i bebe awa.