RAPORT POLISAL DI 23 MAART 2017

BOTO SOSPECHOSO.

Durante un patruyahe na e parti nort di ” California Lighthouse” na kosta nort, polisnan a nota un lus kòrá riba laman.
Ora ku polisnan a pasa eybanda, e lus kòrá a kuminsá move i lusnan blanku a wòrdu sendé.
A resultá di ta un boto.
Polisnan a suponé ku e boto a kuminsá nabegá, ora ku el a mira lusnan di polis,mirando ku na momentu ku polisnan a konstatá e boto, e tabata kompletamente den sukú.
E boto tabata riba un distansia di masomenos  500 m. for di kosta.
A tuma kontakto ku S.C.P., kende nan a pone polis maritimo na altura.
Wardakosta a deklará ku ya nan tabatin e boto na bista pa un ratu kaba i ku esaki tabata nabegando direkshon di Hadicurari.
Algun minüt despues, polisnan a bai Hadicurari i a mira e boto ankrá.
Un hòmber a aserká polisnan .
Polisnan a papia papiamentu ku e hòmber aki.
E hòmber no a reakshoná pero despues a kuminsá komúnika na spañó.
A puntra e hòmber for di unda el a bini.
El a bisa ku e tabata piskando i ku el a kaba di baha for di un boto.
Riba pregunta di polis, unda e ta biba, el a kontestá di ta biba na Venezuela i ku lo e tin ya 3 luna riba e isla.
A puntr’é si e tabatin un pasaporte bálido, i e no por a mustra esaki ni un pèrmit pa turista.  E hòmber tabata hole piská fresku.
Pa banda di 01:50, a detené e hòmber sospechá di violashon di lei.
Mientrastantu e pèrsonal di wardakosta i polis marítimo a yega na e sitio
Esakinan a subi a bordo di e boto i a kuminsá kontrolá.
E boto a resultá di ta un boto di piskado konosí. 
E hòmber a resultá di ta L.M.
Mas lat a yega un hòmber na warda di polis i a mustra un pèrmit di estadía bálido di L.M.
Despues di deliberashon ku H.O.v.J., e hòmber a wòrdu lagá den libertat.
============================
          PÈRSONA DESORIENTÁ.

Riba 23 di mart 2017, alrededor di 05:00, CVD a dirigí patruya direkshon krusada “Superfood Plaza”, pa un pèrsona ku lo tabata kana meimei di kaminda.
Na yegada, polisnan a konstatá ku enbèrdat tabatin un hòmber kanando riba kaminda .
Polis a hala e hòmber su atenshon, riba su komportashon i akshon.
Na promé bista, polisnan a konstatá ku e hòmber tabata bou di influensia di un sustansia.
E hòmber no tabata bon bei i tabata tur konfundí.
Según e hòmber, lo e tabata enkontrá su mes na altura di Malmok n’e momentu ey, sinembargo e tabata na altura di Superfood.
Pa e motibu di esaki, polis a disidí di detené e hòmber pa violashon di artíkulo 3:52, di e buki di Ley di kódigo penal di Aruba.

SCP a keda poné na altura di e kaso.
============================
       PÈRSONA SOSPECHOSO

SCP a dirigí patruya na Erasmusstraat en konekshon ku un pèrsona sospechoso.
Yegando na e sitio, e habitantenan no tabata na kas.
Polisnan a papia ku e bisiña, kende a deklará di a mira un bagabundo pasa diferente biaha riba un baiskel banda di e kasnan..
Algun minüt despues, e bisiña a mira e mesun bagabundo aki bula sali for di e kurá di e adrès ariba menshoná, i a kore bai riba un baiskel.

SCP a wòrdu poné na altura di e kaso