Synergy Aerospace i Insel Air a firma akuerdo – Synergy Aerospace and InselAir reach agreement

Synergy Aerospace i Insel Air a firma akuerdo

Willemstad – Minister demisionario di Desaroyo Ekónomiko Eugene Rhuggenaath ta kontentu di por anunsiá ku Insel Air a yega na un akuerdo di intenshon (‘LOI – letter of intent’) ku doño di Avianca Holdings, Synergy Aerospace, pa eksplorá e posibilidat pa e grupo di Avianca bira partner stratègiko di InselAir, p’asina segurá kontinuidat di operashon di Insel Air. Partidonan a kombiní pa yega na un Heads of Agreement (‘HoA’) riba kontenido i struktura di e aliansa aki den dos siman i un akuerdo final den 4 pa 6 siman. Mas aleu, Sr. Rhuggenaath a konfirmá ku mirando e urgensha pa stabilisá Insel Air i salbaguardiá konektividat aerio, pero tambe kuponan di trabou, ya partidonan a akordá un HoA den konsepto. E LOI a wòrdu firmá pa representante di Synergy, Insel Air, i Minister Rhuggenaath komo testigu.

Na yanuari último, Gobièrnu di Kòrsou a drenta den un areglo di finansiamentu di gastunan operashonal di Inselair ku meta pa yuda stabilisá e kompania, bou di kondishonnan estrikto. Esaki pa duna tempu na Insel Air, bou di un maneho nobo, pa traha riba un plan di stabilisashon siguí pa un business plan di mas añã pa e kompania. Tambe Gobìernu a enfatisá ku ta importante pa Insel buska un partner stratègiko ku por yuda krea un perspektiva mas sigur pa e kompania. E finansiamentu no ta intenshoná pa kubri debenan di Insel Air (tampoko pa akshonistanan) i konsekuentemente a hasi un apelashon na tur kreditor pa wanta ku kobransa di nan debe te despues di implementashon di e plan di stabilisashon. Insel Air na su turno mester a kumpli ku tur gastu koriente.

Gobièrnu su desishon pa duna asistensha na InselAir tabata motivá pa garantisá konektividat aerio pa nos poblashon, partikularmente entre nos islanan bisiña. Aktualmente Insel Air no tin remplasante riba e rutanan aki i nos tin ku realisá ku pa lanta otro aerolinia por tuma mínimo 6 luna i hasta te ku 5 aña. Esaki pa motibunan di e proseduranan envolví, pa loke ta eksigenha di lisensia i tratadonan internashonal. Mientrastantu pueblo di Kòrsou lo keda sin konekshon ku entre otro Aruba i St. Maarten, i por gran parti ku Boneiru.

Tambe a skohe pa intervení pa garantisá seguridat di e pasaheronan lokal i internashonal; ademas a skohe pa garantisá e mas tantu kupo di trabou posibel. Ta trata no solamente e kuponan di trabou di Insel Air mes, pero tambe kuponan di trabou ku ta relatá na e servisio aerio di Insel Air. Aki ta trata di hendenan ku ta traha na aeropuerto mes, taksistanan, trahadó di hotelnan i restourantnan ku ta depende di turistanan ku Inselair ta trese. Na 2016 Insel Air a trese alrededor di 16% di tur turista Kòrsou (85 mil ‘arrivals’) i a nifiká 100 mion florin na entrada pa e sektor di hospitalidat. Pa loke ta impuesto di aeropuerto Insel Air a trese 12 mion florin pa aña. Insel Air su kontribushon total na Kòrsou su ekonomia ta alrededor di 250 mion florin. Tambe mester kòrda riba nos empresarionan, profeshonalnen, famianan, deportistanan, etc, ku ta dependé di Insel Air pa biaha entre e islanan.

E trayektorio despues ku a firma e areglo di finansiamentu tabata bastante difisil. Na promé lugá, sin ku por a premirá esaki, Insel Air a wórdu konfrontá ku e desishon di autoridat aeronautiko di Aruba pa ‘ground’ su avionnan. Despues autoridatnan Merikano i Hulandes a desakonsehá nan funshonarionan pa bula ku Insel Air. Esakinan a afektá e imagen di InselAir di tal manera ku esaki a kondusí na pèrdidanan kuantioso di entrada i tambe oumento drástiko di gastu en konekshon ku e.o. pagonan pa avionnan ‘wet lease’ i gastunan relashoná ku pasaheronan ku a keda pegá. Konsekuentemente, e situashon finansiero di Insel Air a resultá den un peor estado ku a antisipá. Lógikamente e planifikashon di ruta, tamaño di flota i kantidat di personal no por a wòrdu mantené. Es mas, promé ku gobièrnu a intervení ya gerensia anterior a anunsiá ku lo bai tin retiro di personal.

Komo konsekuensha di e e empeorashon drástiko di e situashon finansiero, e kontratiempunan di e último lunanan aki i e inkietut kresiente serka e kreditornan, Insel Air a disidi pa pidi moratorio di pago pa su debenan (‘Surseance van betaling’) pa por haña rosea i pa por sigui enfoká riba stabilisa e kompania. E situashon aki, probablemente i desafortunadamente a aselerá retiro di un grupo adishonal di empleadonan di Insel Air.

Minister Rhuggenaath ta indiká ku ta p’esei e ta lamentá ku algún hende, bou di kua tambe algún polítiko, a trata di hasi uso di e situashon penoso di hopi tata i mama di famia i tambe hóbennan den komienso di nan bida profeshonal ku a pèrdè nan trabou, pa finnan polítiko. Algu ku sigur no ta reflehá normanan di desensia, ni tampoko di kombibensia.

Den mes rosea a trata di krea impreshon ku Gobièrnu intenshonalmente stroba negosashonnan entre Avianca i Insel Air. Al kontrario, ya tabata tin kombèrsashonnan andando ku doño di Avianca for di oktober aña pasá, pero manera ta usual den e tipo di prosesonan aki a hiba kombersashonnan eksploratorio di un manera responsabel, trankil, i den silensio (‘binnenskamers’) i pues no públikamente, komo ku esaki lo por a stroba un resultado eksitoso. Synergy Aerospace, doño di Avianca Holdings, manera kualke empresá internashonal lo no a spera otro di Insel Air i sigur Gobièrnu di Kòrsou, ku tin amplio eksperensha den a arena internashonal.
Mester enfatisá ku Synergy nunka no tabata dispuesto pa drenta den un partnership stratègiko ku InselAir den e situashon finansiero ku e kompania ta. Ta pesei intervenshon di Gobièrnu tabata indespensabel pa interesá Synergy den Insel i meskos kontinuashon di envolvimentu di Gobièrnu lo keda importante pa logra eksito di e partnership aki.

Konkluyendo, Sr. Rhuggenaath ta keda para tras di e desishon pa Gobièrnu intervení den e situashon di nos konektividat aerio i pa den e kuadro aki duna asistensha na Insel Air, komo ku e tin sigur ku si nò ta pa esaki, e kompania lo a stòp di bula for di aña pasá ku konsekuensha ku gran parti di nos konektividat i tur kupo di trabou na Insel Air lo a bai pèrdí. Ta bin aserka ku historikamente a prueba di ta kasi imposibel pa reskatá un kompania di aviashon ku a stòp di bula. Ademas un partnership stratègiko lo ta práktikamente imposibel sin ku e intervenshon a tuma luga.

Minister Rhuggenaath ta di opinion ku firmamentu di e akuerdo di intenshon aki potensialmente por nifiká ku tin perspektiva pa kontinuidat di un aerolínea na Korsou, ku mantenshon di kuponan di trabou pa nos hendenan, i ku e aliansa ku aktualmente ta wòrdu negoshá lo permití pa reforsá e imagen di Kòrsou komo destinashon pa invershonista internashonal, komo sentro (hup) pa konektividat aerio i konservashon di nos tradishon riku den mundu di aviashon.
==============

Synergy Aerospace and InselAir reach agreement

Willemstad – Today, with the signing of a Letter of Intent (LoI), a first step is taken on the way to a potential strategic partnership between Synergy Aerospace and InselAir.
The talks for this LoI were initiated earlier this year between minister Rhuggenaath and Mr German Efromovich, the CEO of Synergy Aerospace.

Based on the LoI, parties will focus on reaching an agreement which outlines the steps to be taken to consolidate the strategic partnership.

Minister Rhuggenaath is very happy with this LoI, as Synergy Aerospace is a very reputable partner that can safeguard the crucial connectivity for Curaçao by air and expand its horizons‎. Mr Efromovich indicated that a presence on Curaçao fits perfectly in the corporate strategy of Synergy Aerospace.

The negotiations with representatives of the Synergy Aerospace to reach an Agreement have started and parties will try to reach it within six weeks.

Synergy Aerospace is Latin America’s leading commercial aviation corporation, with presence extending from the Rio Grande to Patagonia. Synergy Aerospace is the main shareholder of Avianca Holdings. On top of its wholly owned airline subsidiary in Brazil, Synergy Aerospace has more recently acquired airline interests in Argentina and Mexico and is now exploring further penetration into the Caribbean region.