DEMOKRASIA VS DIKTADURA

DEMOKRASIA VS DIKTADURA

Gabinete Koeiman a pèrdè sosten di parlamento dia 12 di febrüari último. Gabinete Koeiman a entregá, konforme lei, retiro mesun dia i a bira demishonario. A disolvé parlamento konforme artíkulo 53 di Areglo di Estado i huntu ku Gobernador a stipulá un fecha pa un elekshon antisipá ku ta dia 28 di aprel 2017.

E proseso pa nombra un gobièrnu interino a inisiá i a kulminá. E gobièrnu interino a haña komo tarea mayó serka Gobernador pa kontinuá ku e preparashonnan pa elekshon di dia 28 di aprel próksimo i atendé ku kasonan koriente. Esaki no opstante ku e bloke di 12 a indiká nan deseo pa medio di un moshon ku nan ke para elekshon. E deseo aki a keda te na deseo, pasombra ni Gabinete demishonario Koeiman, ni Gobernador i ni Konseho di Minister di Reino a indiká bon kla ku konforme leinan vigente i tratadonan internashonal, ku no por kumpli ku e deseo di e bloke di 12 pa para elekshon.

Despues di un proseso di formashon Gobernador a instalá djabièrnè dia 24 di mart último un gobièrnu interino di Gabinete Pisas. Kontrali na e indikashon di Gobernador, fechá 12 di febrüari último, ku e gobièrnu interino a haña komo tarea mayó pa sigui atendé ku e preparashonnan pa elekshon, den ménos ku un par di ora ku e gabinete interino e keda instalá nan a deklará ku elekshon di dia 28 d aprel próksimo a para.

E desishon aki a wòrdu tumá durante di un reunion ekstraordinario di Konseho di Minister. E desishon ta pa entregá un petishon na Korte di Hustisia Oropeo pa laga para e elekshon di dia 28 di aprel 2017. Nan a partisipá e desishon aki durante di un manifestashon polítiko ku partidonan i independientenan di e bloke di 12 huntu ku e ministernan nobo ku a kaba di huramentá a organisá. Di e forma aki nan ta aplikando nan strategia di sigui mal informá pueblo di Kòrsou i trese duda ku elekshon di dia 28 di aprel lo sigui.

Ta bon pa remarká i informá lo korekto. Un Korte di Hustisia Oropeo lo atendé un kaso di un pais solamente ora esaki a agotá tur proseso interno legal den su pais i den nos kaso den Reino Hulandes.

Den un demokrasia kaminda dignidat humano i hustisia soshal ta pará sentral pa partido MAN nos no por para mira kon intentonan di diktadura ke kaba ku nos demokrasia.

Ta p’esei nos ta sali pa protehá e demokrasia di e Yu Di Kòrsou (YDK) ku tin un derechi sagrado pa por skohe di un manera liber su representantenan di pueblo. Partido MAN ta sali tambe na defensa di e suidadanonan ku ta wòrdu manipulá i indòktriná pa e bloke di 12.

Aparte di esaki e bloke di 12 i su eksponentenan ta intimidá polítikonan i tambe suidadanonan ku sí ke pa elekshon tuma lugá dia 28 di aprel. Esaki ku e meta pa krea spantu i miedu i divishon den komunidat. Partido MAN lo no sukumbí pa e práktikanan maligno aki.

Partido MAN no ta pèrmití pa e bloke di 12 sera boka di pueblo dor di ke para elekshon. Partido MAN lo hasi uso di tur su forsa pa bringa i sali na vanguardia di nos demokrasia.

Ku e posishon i informashon aki Partido MAN ke trese trankilidat pa e pueblo di Kòrsou.

Nos no mester permití ningun parlamentario i mandatario ku no ta respetá nos demokrasia i ku tin agèndanan personal bin kita nos trankilidat i nos derechi sagrado ku nos tin pa vota. Partido MAN lo kana dilanti pa bringa tur intento i/òf akshon di diktadura ku ta un menasa pa nos demokrasia.

Diktadura ta bini ora sierto polítikonan ku ta mira un elekshon demokrátiko i liber komo un menasa ku nan lo pèrdè poder. Esaki ta e miedu pániko ku ta biba bou di e bloke di 12 ku nan lo move shelu i tera pa para elekshon.

Nos no tin ku laga gritunan populista i di menasa yena nos ku miedu pa asina trese duda ku elekshon di dia 28 di aprel ta sigui. Partido MAN no ke pa nos pèrdè nos enfoke. Laga nos ban vota masalmente pa e partido ku den unidat ke trese trankilidat i seguridat pa Kòrsou i ku ke sigui kuida nos demokrasia. Esaki ta punto di lansa di Partido Man.

Wak p’ariba, wak p’abou. MAN pa Kòrsou.

Partido MAN