NUMBER DI CRIB OBLIGATORIO PA PERSONANAN KU TA IMPORTÁ KARGA

Entrante 3 di aprel 2017
NUMBER DI CRIB OBLIGATORIO PA PERSONANAN KU TA IMPORTÁ KARGA
Willemstad – Entrante djaluna, 3 di aprel 2017 próksimo uso di number di CRIB ta bira obligatorio tambe pa deklarashon di produkto òf merkansia ku un individuo ta importá. Normalmente esaki ta obligatorio pa kompania i organisashonnan so. Entrante 3 di aprel e maneho aki ta konta tambe pa tur persona ku ta importá un produkto òf merkansia via avion òf barku, inkluso importashon via pòst i internet tambe.
Tur persona ku ta biba na Kòrsou i ta inskribí na Kranshi i tambe tur empresa i organisashon ku ta inskribí na Kámara di Komersio i ta aktivo na Servisio di Impuesto tin un number di CRIB. Ku otro palabra e persona òf instansha konserní tin un relashon kaba ku Servisio di Impuesto i probablemente ta atendé i paga un di diferente impuestonan ku gobièrnu ta kobra. Resientemente Duana Kòrsou a konektá tur number di CRIB di Servisio di Impuesto (Belastingdienst) di partíkularnan ku e sistema elektróniko Asycuda di Duana. Ku e konekshon aki e persona en kuestion òf e kompania ku ta hasi deklarashon na nòmber di e persona aki en prinsipio no mester bai personalmente na Servisio di Impuesto pa buska su number di CRIB.
Den kaso ku un kliente no tin number di CRIB e kliente (importadó) mester aserká Servisio di Impuesto pa haña un number di CRIB personal. Pa personanan ku no ta biba na Kòrsou, pero ta importá produkto òf merkansia òf ta importá algu temporal i tambe pa turistanan, entrante e mesun fecha di 3 di aprel, ta obligatorio pa usa un prueba di identidat bálido. Den e kaso aki e uso di pasport ta obligatorio. Pa hóbennan bou di 18 aña, ku tambe ta importá pakete, e deklarante mester usa number di CRIB di un di e mayornan òf voogd. Si e mayor òf voogd no tin number di CRIB e mester buska un number na Servisio di Impuesto. Den tur kaso e mayor/voogd mester outorisá e hóben pa e por usa esaki. Esaki ta nifiká tambe ku e hóben konserní mester di un komprobante ku e adulto ta su mayor òf voogd.
Ta importante pa Duana tin un bon bista di tur karga ku ta drenta Kòrsou i tin informashon básiko di e importadó. Esaki teniendo kuenta ku su ròl di kontribushon efektivo na (fluho di) entrada, desaroyo ekonómiko, seguridat, medio ambiente i salubridat pero tambe esun di kontrolá i investigá karganan prohibí deskribí den lei. Pa e motibu aki Duana ta pone énfasis riba informashonnan korekto ku un partikular ta duna na momentu ku ta hasi un deklarashon. Den e kaso aki tantu e number di CRIB komo informashonnan di e mayor òf voogd konserní i tambe tur informashon di karga mester ta korekto.
Pa mas informashon tokante entre otro importashon, kiko por importá òf nò i pa kua produkto i bou di kua kondishon por haña eksonerashon bishitá e website http://www.douane.cw. Bishitá, Like i Share tambe e página di Facebook Douane Curaçao pa keda na altura di informashonnan balioso di Duana.