PAR ta pidi pa kanselá su petishon pa e reunion pa deliberá tokante di e “posibel medidanan di alto supervishon ku ta na kaminda.

Presidente di Parlamento
Sr. A. Thode
Wilhelminaplein # 4
Curaçao.

Willemstad, 12 aprel 2017.

Frakshon di PAR riba 31 di mart 2017 a hasi un petishon na presidente pa konvoká un reunion relámpago pa deliberá riba un posibel medida di alto supervishon ku ta na kaminda pa garantisá ku e elekshon di dia 28 di aprel ta sigui sin estorbo.

Entretantu kasi dos siman a transkurí despues ku nos a solisitá e reunion i nos ta komprondé ku presidente no a komprondé nos petishon. Alabes nos a nota ku e Medida di Alto Supervishon di parti di Reino, konforme artíkulo 43 di nos statüt, ta un echo. Alabes e la duna un tremendo Sertifikado di Inkompetensia na e gobièrnu aktual, demostrando ku e gobièrnu aki no por ni garantisá ku komunidat di Kòrsou independientemente for di Reino, por hasi uso di su derechi di voto di un forma liber manera e.o. deskribí den artíkulo 21 di e Deklarashon Universal di e derechi di Hende. Algu históriko pa nos pais! E akto aki a resultá di ta djis un preludio di e diferente debakelnan ku e gobièrnu interino aki a bin ta kousa. Frakshon di PAR ta un frakshon responsabel i ke evitá mas bèrgwensa pa e komunidat aki den Siman Santu, ku nos sí ta respetá.

P’esei frakshon di PAR ta kanselá su petishon pa e reunion pa deliberá tokante di e “posibel medidanan di alto supervishon ku ta na kaminda” ku presidente a pone pa tuma lugá riba “Jueves Santo”. Nos ta spera ku presidente ta kanselá e reunion konforme nos petishon.

Atentamente

Drs. Marilyn Alcalá-Wallé

Dhr. Curtley Obispo

Dhr. Stephen Walroud