Elfried Koots Partido MAN: populismo i negativismo vs trankilidat i seguridat

Kòrsou, 18 di aprel 2016

Tópiko: populismo i negativismo vs trankilidat i seguridat

Promé ku 10-10-‘10 temporada di kampaña tabata un folklor, tabata un libertat di ekspreshon di koló polítiko, tabata un temporada di hopi t-shirt i pèchi, hopi banderin di outo, hopi stiker, hopi bandera riba kaya i tambe na kas di votadónan.

Pero for di momentu ku populismo a lanta kabes den nos komunidat i den nos polítika lokal tur e folklor di kampaña kasi ta bayendo pèrdí. Populismo ta intimidá, ta agredí, ta papia palabranan grosero, ta fomentá rabia, ta fomentá enemistat, ta fomentá desunion.
Populismo a drenta den nos parlamento, den nos ‘talk show’ nan, riba kaya i lokual ku populismo ta hasiendo aktualmente ta destruí materialnan di propaganda di diferente partidonan polítiko i hasta a yega asina leu di kometé un atentado terorista dor di purba sende sede di un partido politiko na kandela. Nos ta kondena esaki enfatikamente, e akto aki ta un atentado kontra di nos demokrasia.
Lokual ku populismo ta hasi tambe ta demonisá hende drechi dor tira kulpa riba simpatisadónan di partido polítikonan di nan aktonan destruktivo.

Apesar ku populismo a haña kaminda pa kana i krese den nos komunidat nos di MAN ta keda resistí kontra e desaroyo negativo aki, pasombra e no ta na bienestar di Kòrsou.
 

Nos ta rechasá i kondená enérgikamente e aktonan di destrukshon, di vandalismo, di terorismo, di intimidashon, di agreshon, di groseria i atentado kontra di nos demokrasia.
Nos ta sali na vanguardia di esnan tambe ku ta wòrdu uzá pa prediká i praktiká populismo, pasombra nan tambe ta yu’i Kòrsou. Nos di MAN lo sigui para pa e kosnan bon. Nos ke krea e yu’i Kòrsou Nobo ku ta konstruí, ku ta dialogá, ku ta desente, ku ta respetuoso, ku ta íntegro I ku ta kere den su mes.

Nos ta hasi un apelashon na tur esnan ku ta práktika populismo pa stòp di hasi esaki, pasombra bo ta kibra e komunidat aki na wèrki. Bo ta krea odio i rabia den e pueblo. Laga e pueblo trankil pa e sinti su mes sigur ku e por ekspresá su eskoho polítiko di un forma demokrátiko ya asina e por bai vota dia 28 di aprel próksimo den tur trankilidat.

Ban buska unidat, ban buska e kosnan ku ta bon pa Kòrsou i laga e diferenshanan un banda, pasombra pueblo no ta sirbí ku tantu negativismo i antagonismo asina. Ta basta awor. Nos mester por krea unidat. Nos pueblo ke trankilidat i seguridat. MAN ta pará pa unidat pa asina nos por goberná e pais aki realmente na bienestar di e pueblo. Ban konsentra mas riba lokualnan ta uni nos pueblo enbes di e kosnan ku ta dividi nos.

ing. Elfried Koots
Partido MAN