PAR: sra,Marilyn Alcalá-Wallé: petishon pa manda rapòrt Wiel bek pa e Komishon pa koregí e erornan garafal den e rapòrt menshoná.

Minister enkargá ku Asuntunan di Hustisia
Sr. G. Pisas
Fort Amsterdam
Presente

Willemstad, 2 mei 2017.

Tópiko: petishon pa manda rapòrt Wiel bek pa e Komishon pa koregí e erornan
garafal den e rapòrt menshoná.

Riba djabièrnè 21 di aprel 2017 suskrito despues di a tuma nota ku e presidente di Parlamento aktual a manda un konvokashon pa asistí na un reunion públiko riba djaluna 24 di aprel 2017 pa deliberá ku Minister di Hustisia enkuanto e rapòrt di Komishon di Investigashon (Komishon Wiel) en konekshon ku susesonan promé, durante I despues di e reunion públiko di Parlamento di 4 di yanüari 2017, na nòmber di frakshon di PAR a hasi un petishon na e presidente di Parlamento pa posponé e reunion.
E presidente aktual sinembargo, manera ta kustumber, no sa duna oido na petishonnan di PAR, tampoko a manda e rapòrt bek pa minister di Hustisia, I e la laga e reunion kontinuá siendo e rapòrt Wiel ta kontené erornan grave i kondenabel ku mester wòrdu koregí. E rapòrt ta kontené diferente pasashi ku ta basá riba suposishon I no riba echo! Frakshon di PAR ta konsiderá e rapòrt den su forma aktual no kompleto I tampoko kla pa tratamentu den un reunion di Parlamento.
Den e kapítulo di e rapòrt Wiel kaminda ta trata e konstatashonnan riba e marcha di e reunion suskrito ke informá lo siguiente. E eks-presidente di Parlamento riba 4 di yanüari 2017 a habri e reunion na momento ku tabatin quorum. Miéntras e presidente ta hibando palabra e ta wòrdu interumpí konstantemente dor di un miembro ku ta pidi “roll call”, siendo tin quorum. Aki tin dos punto importante ku frakshon di PAR ke menshoná:

1. Tarea di e Presidente di Parlamento:
a. Un di tareanan komo presidente di Parlamento ta pa guia e trabounan den Parlamento konforme e Reglamento di Orden di Kòrsou (art. 7 a);
b. Un otro di e presidente ta pa mantené òrdu durante e di Parlamento (art. 7 c); reunionnan
c. Un otro tarea ta pa duna palabra (art 7d). Relashoná ku esaki artíkulo 77 di e reglamento ta duna indikashon na kua momento un miembro ta hiba palabra: ni un miembro no or hiba palabra promé ku e la solisitá esaki I haña palabra di e presidente di parlamento. Ta insolitó ku un presidente ta hibando palabra, e ta wòrdu interumpí konstantemente pa pidi “roll call”, siendo tur presente ta nota ku tin quorum pa e reunion sigui. No por otro, ku e intenshon maligno di e miembro di Parlamento ku tabata interumpí kontinuamente su meta prinsipal tabata pa pidi e “roll call” (despues ku e la duna instrukshon na diferente miembro pa “stand by”) I kore Sali bai manera e la hasi na diferente okashon. E intenshon tabata pa laga e 7 miembronan keda sin wòrdu huramentá, di manera ku nan por a krea un káos den gobernashon I stroba e gobièrnu pa traha pa pueblo.

2. Interupshon di Presidente miéntras e ta hiba palabra I siendo tin quorum:
Pa bin bek riba e rapòrt di Komishon Wiel ta bon pa menshoná ku e Komishon no tabat’ei presente pero a konstatá ku e presidente mester a duna palabra na e miembro ku a pidi “roll call”. E komishon ta hasi dos fayo grandi: 1. No ta tene kuenta ku ora un presidente ta hibando palabra bo no por interumpié sin mas. Tur presidente di Parlamento ta eksigí pa e kaba di hiba palabra promé ku e duna palabra na un miembro. Den e reunion di 4 di yanüari no kier a laga e presidente kaba di hiba su palabra. Ta un forma mas grosero I sin rèspèt pa keda pretendé ku ora un presidente ta hibando palabra bo mester keda interumpié. 2. Na momento ku a pidi “roll call” e presidente I tur presente ta mira ku tin quorum. Artíkulo 67 di e Reglamento di Orden ta indiká ku ora ku no tin 11 miembro mas presente den e reunion, e presidente ta posponé e reunion, despues ku e la yama kada miembro pa verifiká ku nan ta presente. Den e kaso di 4 di yanüari 2017 tur presente por a nota ku tabatin quorum, pues kua tabata e nesesidat pa e presidente hasi uso di artíkulo 67? Aki ta nota atrobe e meta ku tabatin tras di e “roll call”. Pa Sali kore bai for di sala I stroba funshonamentu di Parlamento I strob’e 7 miembro nobo demokrátikamente skohe pa drenta parlamento. Ademas ta bon pa menshoná eksplísitamente ku suskrito tabata presidente di e Komishon di Investigashon di Kredensial. Despues ku e rapòrt a Sali suskrito a aserka e otro miembronan ku tabata den e komishon di Investigashon di Kredensial I ta bon pa menshoná ku no tin un solo momento ku e Komishon Wiel a aserka ningun di e miembronan di e Komishon di Investigashon di Kredensial pa ningun pregunta ni aklarashon riba e suseso di 4 di yanüari último.

Mirando e situashon lamentabel aki, kaminda un rapòrt ku mester ta basá riba echo I no riba suposishon, suskrito konforme artíkulo 96 di e Reglamento di Orden di Parlamento ta hasi uso di su derechi di hasi e siguiente preguntanan na Minister, ku e petishon pa kontesta nan rápidamente:
1. Minister por ta asina bon di revoká entrega di e rapòrt na Parlamento i mand’e ku velosidat relámpago bek pa e Komishon Wiel pa korekshon basá riba echo?
2. Mirando e seriedat di e defisiensia den kuerpo polisial riba 4 di yanüari 2017 kua ta tur e akshonnan ku Minister di Hustisia a tuma for di momento ku e la risibí e rapòrt menshoná pa mehorá di e funshonamentu di e kuerpo polisial?

Sperando riba kontesta urgente,

Drs. Marilyn Alcalá-Wallé (PAR)

Miembro di Parlamento di Kòrsou
Lider di Frakshon di PAR

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: