A haya evidencia di habitacion durante e Periodo Preceramico na e punta Zuid di Aruba Resultadonan interesante di investigacion preliminario di Museo Arqueologico Aruba di e sitio “Sero Colorado 3”

A haya evidencia di habitacion durante e Periodo Preceramico na e punta Zuid di Aruba Resultadonan interesante di investigacion preliminario di Museo Arqueologico Aruba di e sitio “Sero Colorado 3”

Hayazgonan funebre na e sitio arqueologico di Sero Colorado 3, ta demostra cu actividadnan na e punta zuid di Aruba den e periodo Preceramico (2500 p.C.-1000 d.C.), no tabata refleha solamente bishitanan cortico y temporario di nos antepasadonan, pero ta duna un indicacion fuerte cu nan tabata habita e area aki pa periodonan largo.
Promer cu e descubrimento di e sitio arkeologico aki, indica como “Sero Colorado 3”, Museo Arqueologico tabata conoce diferente sitio den e area aki, di cual 4 ta categoriza como ‘Shell Middens’ (capanan di tera cu restonan di desperdicio di cocolishi, regularmente acompaña pa artefactonan cultural) ubica na “Banki Jerome”, y sitio cu material difundi na “Manzanilla”, cu ta mustra cu nos antepasadonan no a haci uso extensivo di e area aki compara cu e resto di nos isla. Durante e Expedicion Arqueologico 2016, cual Museo Arqueologico a organisa den luna di Monumento (September), interesadonan a haya e oportunidad pa bishita algun di e sitionan aki. E descubrimento di Sero Colorado 3 a trece evidencia concreto di uso hopi mas extensivo na e parti zuid di nos isla durante e periodo conoci como esun Preceramico.
Fechanan recien di radio-carbon procedente di Sero Colorado 3 ta mustra cu e sitio aki a ser usa di añanan 20 te cu 130 despues di Cristo y ta localisa den un abri den un terasa di calichi. E sitio tabata tin tres graf, dos adulto masculino y un mucha, di cual un di e adultonan lamentablemente a ser destrui accidentalmente pa un machin durante trabounan di sondeo den e area aki pa por traha hotel. E otro dos deramento tabata tin piedra di calichi como marcador di graf y probablemente esaki tambe tabata e caso cu e graf destrui.
E tres grafnan aki ta hopi cerca di otro, cual ta mustra cu nan ta parti di un grupo. E individuonan a ser haya den un posicion fetus drumi riba nan banda drechi, cu un orientacion noord-zuid (cabes-pia). Un individo adulto tabata dera cu su cabes hopi cerca di un piedra grandi di calichi. E tabata dera banda di e mucha cu su rudiya drechi hopi cerca di e craneo di e mucha, cual ta sugeri cu nan a ser dera hunto. E mucha tambe tabata dera den un posicion fetus, drumi riba su banda drechi, cu su man robes na su cachete, cual ta un postura cu ta asocia mastanto cu deramento di adultonan na e santananan Preceramico ubica na Canashito (100 p.C.-100 d.C.) y Malmok (440-990 d.C.).
Alabes a haya wesonan di un carpachi di turtuga riba tur dos graf, cualnan ta sugeri cu e adulto y e mucha a ser dera intencionalmente hunto bou di un carpachi. Wesonan similar di turtuga a ser haya den e restonan di e graf destrui, cu ta sugeri cu e individo aki tambe tabata cubri cu un carpachi di turtuga riba cual piedra di calichi tabata poni. E grafnan di e adulto y di e mucha tabata contene cocolishi como regalonan funebre. Banda di e cocolishi, e graf di e adulto alabes tabata contene resto di cangreu y paharito cerca di e craneo, cualnan ta parce di a ser poni intencionalmente den e graf hunto cu e difunto. Cocolishi tambe a ser haya den e resto di e graf destrui, cu ta sugeri un contexto similar na e otro 2 grafnan. E mesun parametronan cultural aki a ser haya na e otro dos santananan Preceramico di Canashito y Malmok.
E resultado di e investigacion preliminario aki, conduci pa e departamento cientifico di Museo Arqueologico Aruba, ta demostra cu actividadnan na e punta zuid di nos isla durante e Periodo Arcaico (e periodo cu nos conoce como eperiodo Pre-ceramico), no tabata solamente producto di bishitanan cortico y temporario na nos isla, pero ta indica fuertemente cu tabata tin habitacion prolonga tumando lugar den e area aki.

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: