MINISTER PRESIDÈNT DI KÒRSOU SR. GILMAR PISAS TA BAI PARTISIPÁ NA FORO DI BELT AND ROAD NA BEIJING, KAPITAL DI CHINA

MINISTER PRESIDÈNT DI KÒRSOU SR. GILMAR PISAS TA BAI PARTISIPÁ NA FORO DI BELT AND ROAD NA BEIJING, KAPITAL DI CHINA

Willemstad – Minister Presidènt Gilmar Pisas a sali awe tardi pa Beijing, kapital di China, enkabesando un delegashon ku ta partisipá na e foro internashonal “Belt and Road Forum for International Cooperation”. Un representashon di Refineria di Kòrsou (RdK) i di Multi Disciplinary Project Team (MDPT) ta kompañá Minister Presidènt Pisas pa partisipá den e diferente aktonan i reunionnan.
E foro ta tuma lugá djadumingu 14 i djaluna 15 di mei awor, i e tema ta “Fortifiká koperashon internashonal i yuda konstruí e ‘Belt and Road’ pa un Desaroyo ‘Win-Win’”. E foro ta konsistí di un seremonia di apertura i un konferensha di nivel haltu riba dia 14 i un mesa rondó pa vários lider mundial riba dia 15.
Presidente di China, Xi Jinping, lo asistí na e seremonia di apertura i lo presidí e mesa rondó pa lidernan mundial.

Diferente lider di mas o ménos 30 pais lo ta presente, manera entre otro Presidentenan Michelle Bachelet di Chile, Mauricio Macri di Argentina i Vladimir Putin di Rusia, i Promé Ministernan Paolo Gentolini di Italia, Muhammad Nawaz Sharif di Pakistan i Mariano Rajoy di Spaña. Ademas di e lidernan mundial lo asistí tambe otro ofisialnan di diferente gobièrnu, empresario, ekspertonan di instituto finansiero i representante di 61 organisashon internashonal.
E foro internashonal aki ta na nivel internashonal máksimo. Na 2013 China a lansa su inisiativa One Belt One Road (OBOR – Un Faha Un Kaminda) i for di e momento ei e inisiativa aki a haña gran akohida riba nivel internashonal. One Belt One Road ta un strategia di desaroyo di gobièrnu Chines basá riba koperashon a base di rèspèt i benefisio mutuo. E manera pa logra e desaroyo aki ta pa medio di e palabra klave ‘konekshon’. Ku e strategia aki gobièrnu di China ke konektá ku paisnan oriental, pero tambe ku paisnan Latinoamerikano i di Karibe. China ta hasi esaki entre otro dor di hasi invershonnan kuantioso den ekonomia di e paisnan. Den e foro benidero China ke sigui haña apoyo i koperashon pa su strategia.
E motibu ku Kòrsou ta partisipá na e foro ta relatá na e intenshonnan di e kompania estatal di China Guangdong Zhenrong Energy Company Ltd. (GZE), ku ta invertí den modernisashon di refineria, CRU i Bullenbaai. Pero mas bon ainda ta ku e strategia di One Belt One Road por brinda Kòrsou e oportunidat úniko pa bira e sentro (hub) for di kua China lo hasi su invershonnan di 250 bion den Karibe i Latinoamérika. Esaki ta pa motibu ku China tin e intenshon di hasi uso di e sektor finansiero di Kòrsou pa laga e fondonan destiná pa invershon yega nan destinashon.
China tin interes pa Kòrsou bira e hub aki, danki na e posishon stratégiko ku Kòrsou tin pa ku Karibe i Latinoamérika, kombiná ku e infrastruktura na nivel internashonal ku Kòrsou ta disponé di dje i e ekspertisio ku ta eksistí lokalmente. Partisipando na e e konferensha grandi aki, Kòrsou ta demonstrá di su banda ku e tin un gran interes pa bira e hub aki, i di e forma aki fortifiká e chèns pa realisá e meta aki.

Minister Presidènt sr. Gilmar Pisas lo kombiná su bishita na China ku reunionnan ku alto representantenan di diferente kompania internashonal Chines, manera entre otro GZE i e kompania di ingenieria HQC.
Tambe e delegashon lo reuní ku diferente instansia finansiero Chines ku a demostrá interes pa bin hasi negoshi ku Kòrsou. E delegashon lo atendé ademas ku e petishon di China Development Bank pa e instituto aki bini Kòrsou fin di e luna aki pa hiba kòmbersashon ku diferente instansia lokal, entre otro Banko Sentral.
E delegashon ta hiba tambe diferente kombersashon ku institutonan di kooperashon internashonal Chines.