KAMPEONATO PAN AMERIKANO DI KARATE SUPER EKSISTOSO A FINALISA

KAMPEONATO PAN AMERIKANO DI KARATE SUPER EKSISTOSO A FINALISA

Kòrsou kompletu por ta orguyoso i satisfecho pa e forma kon karatebond di Kòrsou bou di Presidensia di Sr. Junior Millerson a organisá e di 31 kampeonato Pan Amerikano di karate.
Mas di 400 karateka prosedente di más di 33 pais durante último dianan di fin di siman tras di lomba a kompetí na un nivel hopi altu.
Esaki tantu den pelea (kumite) i kata (demonstrashon di habilidat tèkniko)
Sumamente enkantá representantenan di tur e paisnan a keda ku e bon organisashon di e evento grandi aki i tambe ku e hospitalidad i bunitesa di nos dushi Kòrsou.
Karatebond ta gradísido tambe na tur su kolaboradónan i sponsernan ku a duna nan kontribushon pa hasi e kampeonato Pan Amerikano aki un eksíto rotundo.
Un gradisimentu spesial ta bai tambe na e kompañía FBTT Travel (Taber Tours) ku di un forma sublíme a sorú pa transportashon di e sentenares di karatekanan, refrenan i otro dirigentenan internashonal for di nan yegada na Kòrsou te ku nan salida pa nan respektivo paisnan.
E sala di eksíbishon sumamente grandi i espasioso di WTC bon dekorá pa e magno evento aki, den práktika a resultá sumamente ideal. Pa e rason aki tambe e pròksimo kampeonato mundial di karate (estilo Wado) ta tuma lugá aki na Kòrsou na luna di Oktòbèr pròksimo den mesun lokalidat.
Na e okashon ei lo t’ei presente karatekanan prosedente di más di 40 pais.
Más informashon alrespekto ta sigui despues.
Risibí athunto e resultadonan kompletu di e 31 kampeonato Pan Amerikano di karate realisá aki na Kòrsou.