Minister Quincy Girigorie a despedí komo presidente di Excel Arts Academy i a pasa e batuta pa su susesor sr.Otmar Martina

Minister Quincy Girigorie a despedí komo presidente di Excel Arts Academy i a pasa e batuta pa su susesor sr.Otmar Martina

E konosido “Excel Arts Academy”, un akademia di arte ku for di aña 2000 ta instruyendo mucha i hóbennan kon pa desaroyá i ekspresá nan talentonan artístiko na un forma sano ku por benefisiá tantu nan mes komo nos komunidat, djasabra último 17 di yüni a sera su aña eskolar ku su “Award night” anual.
Den un sala yen di alumno, dosente i mayornan, a rekonosé alumno, mentor i dosentenan ku a destaká den e aña eskolar ku ta yegando na su fin. Tantu e departamento di mucha komo esun di hóben a entregá galardon na entre otro e “Exceller” mas disipliná, integrá, kreativo i a skohe e mama i tata “Exceller”.
Na e okashon aki tambe a tuma despedida di e Presidente di e Akademia, sr.Quincy Girigorie kende pa motibu di su funshon komo Minister di Hustisia, no por sigui funshoná komo presidente di e akademia.
Direktora di e akademia, sra. Shelomi Doran-Bakhuis, a otorgá un plakat na e presidente saliente sr. Quincy Girigorie ku palabranan di gratitut pa su amor, dedikashon i sirbishi komo presidente di fundashon “Excel Arts Academy”.
Sr.Girigorie a pasa e batuta di presidensia pa e presidente nobo di e akademia sr.Otmar Martina kende ta accountant di profeshon i partner na Deloitte Dutch Caribbean.
Sr.Girigorie a splika e importansha di tin un vishon i kere den esaki referiendo na kon Excel Arts Academy a inisiá pa medio di un soño di e direktora di e akademia i ku awor despues di 17 aña, sentenares di mucha, hóben i adulto a partisipá i ta parti di e famia di Excel. E ta sigur ku sr. Otmar Martina ku meskos ku su persona a kuminsá den e akademia aki komo alumno, awor ku su ekspertisia i kurason pa mira Kòrsou bai dilanti, lo hasi un bon trabou pa hiba e akademia den un siguiente nivel. Sr.Martina a komprometé su mes pa hasi tur loke ta posibel pa kontribuí na e kousa noble di e akademia aki i yuda gui’é den retonan nobo ku tin su dilanti.
Tabatin diferente presentashon artístiko i na final di e anochi impreshonante aki direktora Shelomi Doran- Bakhuis a hiba palabra, poniendo énfasis riba e trayektoria largu ku e akademia a kana i ku awor e ta drentando un époka nobo, kaminda e lo bai sirbi e komunidat aun mas mihó. Dia 1 di yüli próksimo e akademia lo tin un presentashon pa públiko en general titulá: “Kòrsou ántes, awor i den futuro” kaminda tur alumno lo tin e oportunidat di demostrá loke nan a siña i eksperensiá durante e aña eskolar.
Atentamente,
Na nòmber di fundashon Excel Arts Academy

Otmar Martina
presidente

This site uses Akismet to reduce spam. Learn how your comment data is processed.

error: Content is protected !!
%d bloggers like this: