Diputado Nina den Heyer: Partipashon Boneiru na Festival del Caribe un reto grandi    

Diputado Nina den Heyer: Partipashon Boneiru na Festival del Caribe un reto grandi
 
 
SANTIAGO DE CUBA – “E partisipashon di Boneiru e aña na Festival den Caribe tabata un reto grandi. Ta e promé i úniko bes ku e festival ta dediká na nos isla i desde ku nos a haña e empaka aña pasá, nos gobièrnu a kuminsá ku e preparashonnan den un forma intensivo”. Esaki diputado Nina den Heyer, enkargá ku kultura, a trese dilanti djasabra atardi den e siudat Santiago de Cuba, dilanti un presensia grandi di prensa kubano.
E mandatario a kuminsá na splika ku Boneiru ta un isla ku kasi 20 mil habitante. Pa laga e periodistanan komprondé esaki bon, el a kompará Boneiru ku un pueblo yamá Cobre, ubiká no masha leu for di Santiago de Cuba.
“Un di e retonan mas grandi tabata riba tereno finansiero. Nos mester a buska e finansa nesesario pa logra trese e artistanan boneriano Cuba. E lunanan ku a pasa nos mester a traha ku artista. I artistanan ta hende diferente. Nos partisipashon na e festival aki ta duna nos e sintimentu dushi di ta parti di Caribe. Mi mester bisa ku personalmente e sintimentu aki ta resaltá aki na Santiago mas ku na Habana. No pa nada, pero aki na Santiago mi ta sinti mi mes mas na kas”, diputado Nina den Heyer a bisa.
E mandatario a elaborá kòrtiku tambe riba e desafionan ku tabatin pa trese e delegashonnan di artista i turista Santiago de Cuba. “No tabata fásil. A ripará esaki por ehèmpel ora ku a resultá ku e dos buelonan planeá pa Santiago no por a sali djasabra, sino te djadumingu. E transporte aki tabata un operashon kostoso, pero al final nos a logra trese 210 persona, entre artista i turista, Cuba. Mitar di e kantidat di hende aki ta turista.”
De Heyer a asentuá ku den e delegashonnan ku a biaha pa Cuba tin gezaghebber Edison Rijna i representante di reino Gilbert Isabella. El a bisa ku e kantidat di 210 persona ku a yega Cuba for di Boneiru ta 1% di e poblashon boneriano, loke ta hopi.