Parlamentario pa partido MAN, sr Eugène Cleopa ta manda un karta pa Minister di Tráfiko, Transporte i Planifikashon Urbano ku e topiko tráfiko pegá relashoná ku trabounan na nos viadukto

Minister di Tráfiko, Transporte i Planifikashon Urbano
Sra. Z. A. M. Jesus-Leito
Seru di Arrarat Parsela C
Presente

Kòrsou, 4 yüli 2017

Tópiko: Tráfiko pegá relashoná ku trabounan na nos viadukto.

Apresiabel Minister,

Mi ta sumamente kontentu ku e trabou nan pa loke ta toka nos viadukto nan a kontinuá despues di algun siman ku a trabou nan a stanka i ku intervenshon di Minister di Tráfiko, Transporte i Planifikashon Urbano i tambe Minister di Finansa e trabou nan aki a kontinuá. Pero mirando e importansia ku usuario nan di brùg tin pa ku tráfiko den mèrdia nos ke puntra Minister ku esaki ta posibel ku e kaya ku ta kondusí bou di viadukto bai Otrabanda (arubastraat) ku esaki lo por keda habri pa e fluho di tráfiko den kual tin vários outomobilista ku tin 1 ora so di pouze pa e tráfiko lo por kore muchu mas fásil i rápido. Nos ta spera ku minister i tambe e kontratista lo tin komprenshon ku esaki pa di tal manera ku e enfoke di nos gobièrnu ta di tende loke ta biba den nos komunidat i na e momentu nan aki i nos a konstatá ku tin hopi preokupashon i iritashon pa e orario di mèrdia ku e kaya ta sera paso hende lo keda konsentrá den tráfiko mucha ora pa despues nan bai destinashon bek di trabou.

Den e kuadro aki mi tin e siguiente preguntanan pa Minister:

1. Minister a tuma nota di e konstelashon di e tráfiko den e orario di mèrdia riba brùg Juliana?
2. Minister ta konsiente ku esaki por trese hopi iritashon den usuarionan di tráfiko den e orario nan ei?
3. Minister ta kere ku por hasi algu den e ámbito ei?
4. Nos ke puntra minister si ta posibel pa hiba un kombersashon ku e kontratista ku entre 12or pa 1or e kaya ei por ta habri pa baha e preshon di tráfiko ku tin mèrdia gradualmente?

Nos ta keda pendiente di un kontesta rápido di Minister riba nos preguntanan.

Atentamente,
Eugène Cleopa
Miembro di Frakshon MAN den Parlamento di Kòrsou

This site uses Akismet to reduce spam. Learn how your comment data is processed.

error: Content is protected !!
%d bloggers like this: