Orashon djamars 18 di yüli 2017
Orashon djamars 18 di yüli 2017
Un hòmber di e tribu di Levi a kasa ku un muhé di e mesun tribu. E muhé a sali na estado i duna lus na un yu hòmber. Ora el a mira kon salú i balente e yu tabata, el a ten’é skondí tres luna largu. Pero ora e no por a ten’é skondí mas, el a kohe un makutu di rit, hunt’é ku breu pa awa no pasa i pone e yu aden. El a laga e makutu den e yerbanan altu ku ta krese den awa kantu di riu Nilo. Ruman muhé di e yu a keda vigilá na un distansia pa mira kiko ta sosodé ku e yu. Despues di poko ratu yu muhé di fárao a yega na e riu pa baña. Turesten e mucha muhénan ku tabata sirbié tabata kana bai bini kantu di riu. Diripiente el a mira e makutu den e yerbanan i el a manda un katibu muhé bai koh’é. Ora el a habri e makutu, el a mira un yu chikí ku tabata yora. El a haña duele di e yu i el a bisa: ‘Ai, ta un yu hebreo!’ E ora ei ruman di e yu a bin bisa yu di fárao: ‘Shon prinsesa ke mi bai buska un menchi hebreo pa shon prinsesa ku por duna e yu akí pechu?’ Yu di fárao a kontestá: ‘Ta bon!’ Mesora e mucha a bai buska mama di e yu. Yu di fárao a bisa e mama: ‘Bai ku e yu akí i dun’é pechu pa mi. Lo mi paga bo loke ta toka bo.’ E mama a tuma e yu i a dun’é pechu. Ora e yu a bira basta grandi, e mama a hib’é pa yu di fárao ku a adopt’é i a yam’é Moises pasobra el a bisa: ‘Mi a sak’é for di awa.’ Un dia Moises, ku tabata hende grandi kaba, a bai bishitá su pueblo hebreo i a mira kon duru nan mester a traha. El a presensiá kon un egipsio tabata gòlpia un hebreo, un di su hendenan! El a wak bon rònt i ora el a mira ku no tabatin ningun hende, el a dal e egipsio mata i a skond’é den santu. E siguiente dia el a sali atrobe i a mira kon dos hebreo tabata bringa ku otro. El a bisa e kulpabel: ‘Di kon bo ta dal bo kompañero?’ Esaki a kontestá: ‘Ta ken a nombra bo hefe i hues riba nos? Akaso bo ta pensa di mata mi meskos ku bo a mata e egipsio?’ Moises a spanta. El a pensa: ‘Até! Nan a haña sa!’ Ora fárao a tende di e asuntu, el a buska Moises pa mata, pero Moises a hui bai Midian i a keda biba aya. Un dia e tabata sintá kantu di un pos
Éksodo 2:1-15
