SOAW a inisiá e programa “Ki Bunita Kreashon”

SOAW a inisiá e programa “Ki Bunita Kreashon”

Willemstad – Den kuadro di su programa i proyektonan pa kombatí pobresa i hasi klientenan ekonómikamente mas independiente, Ministerio di Desaroyo Sosial, Labor i Bienestar (SOAW) a inisiá e programa “Ki Bunita Kreashon” pa kobradónan di ònderstant. Esaki ta e promé programa for di un seri di programa i proyekto di Sektor di Desaroyo Sosial di Ministerio SOAW pa empoderá su klientenan.

E programa ta enserá; formashon personal, kurso básiko di kostura i guia personal. Un total di 15 partisipante lo kuminsá den e programa menshoná ku ta konsistí di un nivel básiko i despues lo pasa pa nivel avansá. E promé fase lo terminá den luna di desèmber i e di dos fase lo terminá den 2018.

Algun di e tópikonan di formashon personal ku lo trata ta: ken mi ta, norma i balor, guia spiritual, komunikashon, kon ta atendé ku konflikto, koperashon, seshonnan di motivashon, kon ta traha un presupuesto, étiketa laboral i abusu relashonal.

E meta ta pa na final di e trayekto e partisipantenan organisá nan mes (bou di guia di SOAW) den forma di un koperativa, pa di e manera aki nan gana nan pan di kada dia komo kosedó i para riba nan mes pia.