Riba Dia di Labor, Frakshon di MAN ta reflehá riba importansia, formashon i derechi di trahadó.

Riba Dia di Labor, Frakshon di MAN ta reflehá riba importansia, formashon i derechi di trahadó. 

 

Diariamente hende hòmber i muhénan ta sali nan kas pa duna un kontribushon na komunidat pa medio di nan labor.

Hende hòmber i muhénan ku ta sali nan kas pa sirbi i protehá.

Hende hòmber i muhénan ku ta kuida nos n’e momentu mas vulnerabel di nos bida.

Hende hòmber i muhénan ku ta traha duru pa otronan ta kómodo.

Hende hòmber i muhénan ku ta dediká mas tempu na nan trabou ku na nan mes kas i famia.

 

Nos mester ta agradesido i apresiá nan tur dia di nobo.

 

Sin embargo riba Dia di Labor nos mester para ketu tambe na esnan ku pa un motibu òf otro a pèrdè nan trabou. No pasó nan mes ke pero paso e situashon laboral na Kòrsou tin su retonan.

Hende hòmber i muhénan ku tin entusiasmo pa sigui traha i duna nan kontribushon pero ku aktualmente no por hasi esaki.

Nos enfoke riba Dia di Labor mester ta pa bini ku akshonnan konkreto pa mehorá e situashon laboral aki na Kòrsou. Asina nos mester atendé ku abusu laboral ku ta sigui al orden del dia den nos pais. Mester bini ku kampaña di informashon pa konsientisá trahadó riba nan derechonan. Tambe mester atendé ku trabounan di durashon korto ku ta kita oportunidat di e trahadó p’e sigui desaroyá den su funshon i yega na su kosnan.

Komo akshon konkreto, Frakshon di MAN, entre otro, a enkaminá e proseso pa yega na un penshun general pa tur trahadó na Kòrsou pa asina garantisá un bida digno ora baha ku penshun. 

Nos enfoke mester ta tambe riba kon ta fasilitá nos hendenan pa nan forma nan mes kontinuo pa asina nan por ehersé otro trabou na momentu ku nan pèrdè nan trabou aktual.

Nos mester kuminsá prepará pa e fenómeno Futuro di Trabou (Future of Work) pa evitá mas desempleo.

Nos tur, trahadó, Gobièrnu, mundu sindikal i komunidat kompleto tin e responsabilidat pa kambia e situashon laboral ku nos tin aktualmente. Nos mester yega na e formula di oro pa logra un situashon laboral saludabel atrobe.

 

Asina so nos por logra ku tur hende pa medio di desaroyo di nos pais por progresá.

 

Frakshon di MAN ta deseá un i tur un felis i fruktífero Dia di Labor.

This site uses Akismet to reduce spam. Learn how your comment data is processed.

%d bloggers like this: