13 di mart 2019, fundashon Alton Paas a hasi un bishita serka Presidente di Parlamento, señor William Millerson.

 13 di mart 2019, fundashon Alton Paas a hasi un bishita serka Presidente di Parlamento, señor William Millerson.

Fundashon Alton Paas a keda fundá na 2012 ku e meta pa entre otro konsientisá públiko en general di efektonan di dwarslaesie. Hopi bes despues di un dwarslaesie e pashènt ta bai rehabilitá despues di sali hòspital, pero despues di e proseso di rehabilitashon no tin nada disponibel mas pa e por mantené loke e a logra durante e proseso di rehabilitashon. E fundashon ta traha riba entre otro e falta di transporte pa aktividatnan sosial, aseptashon di e situashon serka e persona ku dwarlaesie i e famianan. Fondonan pa e fundashon ta bini di donashonnan i fundraising manera e “Annual Fitness Challenge”.

E fundashon a logra ku vários inisiativa:

– lokalidat ku ekipo pa ehersisio i training;

– kongreso anual;

– drenta barionan;

– konsientisashon via medionan di komunikashon;

– dos vehíkulo pa transporte.

Fundashon Alton Paas a traha un rapòrt riba aksesibilidat di lugánan manera hotèl i restorant ku yudansa di entre otro MEO.

Na final di e kombersashon Presidente di Parlamento i e fundashon a konkluí ku lo tene un reunion formal di kombinashon di e komishonnan fiho di Parlamento VVRP, SOAW, Hustisia i GMN. Den e reunion aki lo por interkambiá tokante tur e desafionan ku e fundashon ta topa i kon por atendé esakinan tantu riba nivel di legislashon i tambe pa ku e tarea di Parlamento di kontrolá ehekushon di esakinan dor di Gobièrnu.

 

Di parti di e fundashon tabata presente: sr. Paas (presidente), sra. Kopra (Sekretario) i

sra. Martinus (Komisario).