CCDN un biaha mas a organisa un tremendo evento: MANIFESTACION CULTURAL RIBA PLAZA GILBERTO FRANÇOIS ‘BETICO’ CROES TAWATA UN EXITO COMPLETO

Gobierno di Aruba,

 

CCDN un biaha mas a organisa un tremendo evento:

MANIFESTACION CULTURAL RIBA PLAZA GILBERTO FRANÇOIS ‘BETICO’ CROES TAWATA UN EXITO COMPLETO

 

Celebracion di nos Himno y Bandera ta algo cu semper ta uni nos pueblo. Sentimentonan di orguyo ta drenta cada Arubano cu a nace na Aruba of a haci Aruba nan hogar. Cu e sentimento aki, Gobierno di Aruba, bou direccion di CCDN, ta organisa e fiesta pa pueblo disfruta di nos dia nacional.

 

Diadomingo 17 di maart anochi, Aruba henter por a disfruta di un anochi cultural na Plaza Gilberto François ‘Betico’ Croes. Ya den oranan hopi tempran di atardi, e publico a cuminsa yega pa disfruta na grandi un manifestacion cultural na unda realse ta wordo duna na nos artistanan local. E tentnan culinario, di benta di productonan artesanal a wordo basa netamente riba cuminda y articulonan Arubano dunando e sentimento patriotico riba e anochi prome cu celebracion di nos dia nacional.

 

Un anochi di manifestacion cultural na unda varios artista y gruponan di baile local a presenta cu canto y show dedica na nos dushi Aruba. Algo di admira ta cu especialmente a duna tarima na e ganadornan di e festival di canto y poesia durante di e luna di celebracion di nos dia nacional.

 

Parlamentarionan di nos islanan ruman Corsou y Boneiro a onra nos cu nan bishita y hunto cu Parlamentario y Mandatarionan di Aruba, invitadonan y publico a gosa di e anochi aki.

 

Minister di Finansa, Economia y Cultura Xiomara Ruiz-Maduro e anochi aki a duna un discurso hopi elocuente na unda el a haci un apelacion na e pueblo di Aruba pa nos sigui engrandece nos cultura y mantene e historia di nos Himno y Bandera bibo.

 

Por bisa cu e Manifestacion Cultural tawata un exito completo na unda tur presente por a gosa di cuminsamento te final di un bon programacion dedica na nos Himno y Bandera. Un pabien ta bay na e comision CCDN cu a traha duro pa logra e exito total di e evento aki. Na nos pueblo, danki pa un biaha mas haci e fiesta aki grandi cu boso presencia.