NA TUR MANERA A ATVERTÍ GOBIÈRNU .

NA TUR MANERA A ATVERTÍ GOBIÈRNU .

Yves Cooper a uza palabra brutu i ku tono haltu. Pero, ami Erwin Raphaëla ta bai koba hasta den nos historia pa splika. Komunidat di Kòrsou a bini for di e sirkunstansia di algun siglo di kolonialismo i sklabitut. Esaki ta un realidat, ku ningun hende no por kambia, pero no ta nifiká ku nos mester sigui referí kasi tur momento di dia na e pasado ei sin ke hasi nada nos mes pa krea un mihó komunidat di Kòrsou, liber, hustu i manteniendo nos mes debidamente na reglanan importante i nesesario. No pa Ulanda, no pa Merka, nò! Puramente pa nos mes. Ami fo’i e temporada ku mi a biba na Ulanda, debí na kosnan robes ku nos hendenan sa hasi, a tuma mi tempu puntrando mi mes na unda lo mester kuminsá pa krea e sentido di rèspèt pa propiedat i bida di kualke otro hende. Mi ta kòrda por ehèmpel e kantidat di kasonan kaminda yunan di Kòrsou tabata mal komportá, mata otro na fiesta, of na otro enkuentronan sosial, sin ta na nodi. Mi ta kòrda por ehèmpel e kuminsamentu di Zomerkarnaval den Utrecht, hopi aña pasá. Tabatin kasonan di asesinato horibel te ku gobièrnu di Utrecht a disidí di para e karnaval antiano na Utrecht, pero Rotterdam a tuma e karnaval aki over. Na Ulanda nos tin vários kaso den pasado di diskotekanan ku mester a sera nan porta, debí ku yunan di Kòrsou a mata otro. E situashon aki a hasi mi bai hopi leu den pasado i mi ta kòrda teorianan ku tabata pretendé i ke demostrá dikon nos ta un komunidat asina dividí, esta ku for di Afrika a kuminsá ku gueranan entre tribu, pero ku di un manera òf otro a traspasá den DNA di generashonnan siguiente. Sklabitut i kolonialismo segun mi a trese komo herensia ademas diskrepansianan sosial ekonómiko grandi den pueblo. Tin un grupo chikí di personanan ku a logra surpasá e situashon di lucha kontinuo pa sobrebibensia ku enseñansa i formashon, terminando un estudio akadémiko i despues logra un trabou ku ta paga bon. Pero, tin tambe esnan ku a logra danki ku nan a heredá tereno di nan antepasado(nan) di manera ku tòg por a krea un sistema di bida aseptabel. Mas aleu tin e kategoria di suidadano kurasoleño ku a logra establesé un bida na drechi danki na patronahe polítiko i benefisionan optené dor di e gobièrnu di nan preferensia ku siendo na poder a yuda nan. Por lo demas 60 porshento di e komunidat ta kai den e gremio ku un entrada rondó di sueldo mínimo. Mi ta referí aki na sifranan verídiko di senso 2011 pa suprayá mi ponensianan. E situashon ariba menshoná di 60 porshento di nos komunidat ku ta na nivel di sueldo mínimo esta bou di ‘bestaansminimum’ ta sin duda un faktor devastador pa progreso i adelanto di nos komunidat ya ku e ta kondusí na pobresa, deterioro sosial, ladronisia, atrakonan armá i te hasta likidashonnan kruel konektá ku moveshonnan di baho mundu. E situashon di 60 porshento di e komunidat bou di ‘bestaansminimum’ segun mi no ta na nodi si nos organisá nos barionan i disidí porfin ku sistemátikamente ta ban duna un ‘faire chance’ na e sektor agrario, esta esun di plantashon i krio di bestia, di manera ku por lo ménos 10 porshento di suidadanonan aktualmente wantá na ‘bestaansminimum’ ta sali for di e kategoria ei i subi bai ariba. Ku proyekto i aktividatnan turístiko bon organisá tambe por krea kuponan di trabou ku ta saka otro grupo grandi for di ‘bestaansminimum’ manda na un nivel di bida mas haltu, anto asina ei Kòrsou ta bira un isla ku ta floresé. Enfin, ami ta sigui riba e linia di desaroyo di barionan, komo tal bario konsiderá e instrumento pa desaroyá e isla aki, pasobra al final ta den barionan so por lanta tantu sektor agrario komo turismo pone di un forma sólido i duradero riba e suela aki. Mi no por haña mi mes den gobièrnunan ku ta sigui dal bai tuma medidanan sin wak mas aleu. Subi omzetbelasting en realidat ta nifiká mantené e situashon status quo, kaminda suidadanonan ku ya ta bou di e mínimo di eksistensia ta drop bai mas abou. Lógikamente esaki no ta keda sin konsekuensia pa kalidat di bida i nos siguridat nashonal. Gobernantenan ku semper a sigui pensa i aktua meskos mester traha espasio pa otronan ku sí transformá e situashon!  

Erwin Raphaëla

Erwin Raphaëla

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: