Kòrsou komo pais invitá na Riohacha, Colombia den kuadro den interkambio kultural i ekonómiko

Kòrsou komo pais invitá na Riohacha, Colombia den kuadro den interkambio kultural i ekonómiko

WILLEMSTAD – Gobièrnu di Kòrsou a keda invitá na Riohacha, Colombia durante di dianan

21 – 24 mart 2019. Durante di e periodo aki Latino Amérika ta selebrá un di e festivalnan di mas grandi di Vallenato na Colombia, kaminda tin e oportunidat pa interkambio riba area di kultura i ekonomia.

Kòrsou komo pais invitado ta keda representá pa Minister di Enseñansa, Siensia, Kultura & Deporte (ESKD) sra. drs. Marilyn Alcalá-Wallé.

Nos pais ta keda promové dor di presentashon di nos historia, area kultural (aña di kaha di òrgel i nos tumba), area artísiko, turístiko, ekonómiko, desaroyo di nos idioma papiamentu i tambe presentashon di nos músika i baile folkóriko. Banda di promoshon di nos pais, nos Minister di ESKD ta reuní ku diferente ministernan i dignatarionan di Colombia.

Den su afan pa sigui desaroyá, hasi interkambio i traspaso di konosementu riba nivel internashonal, Kòrsou ta bai sera akuerdonan di koperashon na Riohacha riba e tereno di Edukashon i Kultura.

Riba dia 21 di mart tin un Kongreso di ‘Orange Economy” kaminda ta elaborá riba e areanan di inovashon ekonómiko ku ta arte, artesanía, arkitektura, ‘performing arts’, filmashon, moda i músika. E temanan aki ta e areanan ku ta krea oportunidatnan nobo pa desaroyo ekonómiko entre paisnan. Tur e puntonan aki ta kuadra ku e vishon di CILAC (Plataforma pa Latino Amérika i Karibe) ku ta stimulá desaroyo kreativo, inovativo, i empresarial den kuadro di desaroyo duradero i sostenibel. Kòrsou ta partisipá na e kongreso aki i Minister Marilyn Alcalá-Wallé ta e orador ku ta representá nos pais.

Durante di e dianan 22 pa 24 di mart Minister Marilyn Alcalá-Wallé ta bai hasi vários bishita den kuadro di Enseñansa, Deporte i Kultura manera na institutonan universitario – deportivo pa promové koperashon entre e dos paisnan.

Den e programa tambe tin e gran “Festival Francisco El Hombre” kaminda pais Kòrsou ta representá dor artistanan lokal. Artistanan manera Randal Corsen, Gilbert ‘Dibo’ Doran i Ephrem J t bai presentá riba e tarima internashonal ku nos músika. Tambe tin un agrupashon lokal di kaha di òrgel ku ta presentá nos músika kultural komo nos ta den aña di kaha di òrgel ku ta forma parti integral di nos herensia intangibel/tangibel kultural históriko.

Tur esakinan ta trayektonan ku ta kuadra ku e vishon di Gobièrnu ku ta para pa desaroyo i promoshon di e lasonan intergobernamental entre Latino Amérika i Karibe.

gobiernu

 

 

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: