Preguntanan relashoná ku e maneho i situashon finansiero di Stichting Studiefinanciering Curaçao (SSC)

Preguntanan relashoná ku e maneho i situashon finansiero di Stichting Studiefinanciering Curaçao (SSC)

 

Na: Minister di OWCS

Sra. Marilyn Alcala-Walle

PRESENTE

 

Kòrsou, 19 di mart 2019

Tópiko: Preguntanan relashoná ku e maneho i situashon finansiero di

Stichting Studiefinanciering Curaçao (SSC)

Honorabel Sra. Alcala-Walle,     

Frakshon di MFK a tuma nota riba retnan sosial i den prensa dokumentonan di SSC kaminda ta indiká ku na final di 2018, gerensia di SSC a hasi un petishon na gobiernu di Kòrsou pa duna SSC un adelanto di 3 mion florin riba e supsidio ku nan mester risibí den aña 2019. Na medionan di komunikashon nos a skucha Minister Marilyn Alcala-Walle konfirmá esaki.

Serka frakshon di MFK esaki a lanta un preokupashon grandi, mas ainda ora nos a skucha ku e adelanto aki ta pa por paga studiantenan ku ta studiando den eksterior, esaki ta un situashon ku mester wòrdu vigilá di aserka pa nos studiantenan den eksterior pa falta di inkumplimentu di parti di gobiernu di Kòrsou (Lesa SSC) no haña nan mes den problema finansiero.

Hasiendo uso di artíkulo 96 di reglamentu di órden di Parlamento, pa medio di mi persona frakshon di MFK kier hasi Minister Marilyn Alcala-Walle e siguiente preguntanan;

1. Por konkluí ku SSC tin problema finansiero mirando e petishon di nan mes pa haña un adelanto riba e supsidio ku nan mester risibí den 2019?
2. Minister por informá Parlamento ku SSC ta kumpli ku e “Subsidie Verordening?
3. Minister por manda pa Parlamento mas pronto posibel kuentanan anual di SSC di añanan 2013, 2014, 2015, 2016 i 2017, pa Parlamento por tuma nota di maneho finansiero i general di SSC?
4. Kua ta e motibunan ku SSC a duna pa pidi un adelanto riba e supsidio ku nan mester risibí den aña 2019?
5. Si SSC no por kumpli ku pago di nos studiantenan den eksterior, kon Minister ta pensa di atendé ku e situashon aki si e presentá?
6. E trayekto pa retirá e eks direktor di SSC a wòrdu konkluí?
7. Ta bèrdat ku Minister a pidi SOAB pa traha un rapòrt riba e maneho di SSC?
8. Si e kontesta na pregunta 7 ta afirmativo, Minister por informá Parlamento for di kua fecha a hasi e petishon aki i kiko eksaktamente a pidi SOAB?
9. SOAB a entrega e rapòrt aki kaba na Minister?
10. Si kontesta na pregunta 9 ta afirmativo, Minister por manda un kopia di e rapòrt aki pa Parlamento?
11. Si Minister no a risibí e rapòrt di SOAB ainda, Minister por indiká pa ki fecha esaki ta kla i ku Parlamento lo por dispone di dje?

 

Frakshon di MFK representá den e kaso aki pa Parlamentario Gilbert Doran ta spera di haña kontesta mas pronto ku ta posibel, pa asina mayornan di studiantenan den eksterior i esnan ku ta pendiente pa hasi uso di e servionan di SSC por ta trankil i bon informá.  

 

Atentamente,