Un Pais Kòrsou: huntu, un komunidat di kontribuyentenan.

Un Pais Kòrsou: huntu, un komunidat di kontribuyentenan.

Parlamentario Curtley Obispo riba 11 mart 2019, durante e 2 ronda di e reunion di Parlamento di Kòrsou, a bolbe mustra riba e normanan finansiero di artíkulonan 84 i 85 insiso 2 i 4 di nos Areglo di Estado di Kòrsou (nos lei máksimo) i nos leinan fiskal. A base di esaki tur hende tin un deber pa ku nos Pais Kòrsou pa kontribuí por medio di belasting, na gastunan kolektivo pa asina sigui traha na bienestar i progreso di Pais Kòrsou. P’esei ta  super importante ku tur i tur kontribuyente di belasting, huntu, kontribuí na tempu ku nan pago na kaha di Pais Kòrsou. E realidat ta: ku entre otro entradanan di belasting, Pais Kòrsou segun e leinan ariba menshoná ta finansiá gastunan kolektivo pa loke ta trata: (a) supsidionan na fundashonnan, fundashonnan di Gobièrnu di Kòrsou i kompanianan anónimo di Gobièrnu di Kòrsou, (b) supsidionan na e sektor di enseñansa di Kòrsou, (c) gastunan di henter e aparato gubernamental i órganonan di estado pa sirbi nos komunidat, (d) gastunan di interes pa loke ta fiansa, (e) penshun di empleadonan públiko inkluyendo vut i duurtetoeslag, (f) ònderstant i (g) kontribushon na e fondonan di SVB kual ta penshun di behes, lei di labizjan i seguro básiko.   

Parlamentario Curtley Obispo a mustra tambe riba un punto masha importante pa mehorá finansa publiko di Pais Kòrsou kual ta konsientisashon. Mester konsientisá  ku no por tin un komunidat ku ta konsistí di kontribuyentenan ku ta paga tur kos di belasting, kontribuyente nan ku ta paga algu di belasting i kontribuyentenan ku no ta paga nada di belasting. Mester sigui konsientisá nos komunidat pa asina realisá a base di e leinan ariba menshoná, ku tur kontribuyentenan di belasting, huntu, na tempu ta paga belasting, nan kontribushon, nan aporte pa ku progreso i bienestar di nos Pais Kòrsou. E Gobièrnu di Kòrsou aki tin e mishon pa sigui konsientisá, aktua i pone e fundeshi di Un Pais Kòrsou: huntu, un komunidat di kontribuyentenan.  Pa asina yega na un finansa publiko duradero, sostenibel na bienestar di nos tur ku ta biba aki na Kòrsou.