Proposishon pa un komishon i un Task Force kobransa
Proposishon pa un komishon i un Task Force kobransa
Durante e reunion di Parlamento di Kòrsou di dia 27 mart 2019, parlamentario Curtley Obispo a presentá un proposishon na Minister di Finansa, señor Kenneth Gijsbertha, pa lanta un komishon kobransa i un task force kobransa. Ta un echo ku Minister di Finansa a instalá pa medio di dekretonan nashonal un komishon di “doorlichting” di presupuesto di Pais Kòrsou i un komishon pa loke ta trata entrada di belasting, pero lo ta bon pa tambe instalá un komishon di kobransa. Un komishon di kobransa pa spesífikamente investigá por lo ménos: (1) kon efektivo òf no efektivo kobransa di belasting tabata over di periodo 1 yanüari 2011 te ku 31 desèmber 2018. Pa asina sa dikon tin asina tantu sèn di belasting di Pais Kòrsou riba kaya pa kobra, (2) kon por drecha kobransa di belasting i hasi esaki mas efektivo. I tambe instalá un Task force di kobransa pa atendé ku kobransa di belasting riba su mes. Pueblo di Kòrsou i Parlamento di Kòrsou tin derecho di sa kiko a pasa ku kobransa di belasting i kon ta bai drecha esaki na bienestar i progreso di Pais Kòrsou. P’esei e la hasi e siguiente preguntanan na Minister di Finansa: (1) Kiko ta e pensamentu di Minister riba e proposishon aki? (2) Minister tin pensa di ehekutá esaki? Si òf No. Dikon si òf No?.
Tambe parlamentario Curtley Obispo a mustra riba e echo ku promé ku Minister di Finansa aktual, den pasado eks Ministernan di Finansa a yega di instalá 6 Task Force pa loke ta entrada di belasting. Aki e la referí na e dekretonan nashonal numerá:11/0172 i 11/073 di dia 27 yanüari 2011, 13/046 di 4 febrüari 2013, 13/1544 di 8 yüli 2013, 15/1131 di 25 mart 2015 i 15/3589 di 8 òktober 2015. Petishon na Minister pa risibí tur e rapòrtnan di e Task Force nan aki a base di e 6 dekreto nashonal ariba menshoná. Tambe e la puntra ki dia ta planeá pa Parlamento di Kòrsou risibí e rapòrt di e otro komishon ku ta trahando riba e rekomendashonnan di entrada di belasting?
