Parlamentario Curtley Obispo: Pais Kòrsou tin défisitnan operashonal for di 1 yanüari 2011, kual no a wòrdu atend’é i solushoná strukturalmente durante añanan.

Posted by

Pais Kòrsou tin défisitnan operashonal for di 1 yanüari 2011, kual no a wòrdu atend’é i solushoná strukturalmente durante añanan.

Segun Parlamentario Curtley Obispo: un défisit operashonal durante un aña presupuestario di 12 luna, ta ora for di e resultado final di kuenta koriente di Pais Kòrsou, agregá e entradanan no struktural risibí. Ku otro palabra un défisit operashonal di Pais Kòrsou su kuenta koriente durante un aña presupuestario di 12 luna, ta ora ku e total di gastunan kolektivo ta mas ku e total di entradanan struktural risibí for di : (1) kontribushon di kontribuyentenan a base di e 20 kategorianan di belasting ku Pais Kòrsou konosé i (2) servisionan ku Pais Kòrsou ta duna na tur kontribuyentenan i otro entradanan.  

A base di sifranan  di kuentanan anual 2011 te ku 2014 di Pais Kòrsou kontrolá dor di SOAB/Kontrolaria General i Rapòrtnan di Maneho Finansiero (FMR) di 31 desèmber 2015 i 2016, por saka afó ku e défisitnan operashonal di añanan 2011 te ku 2016 a akumulá pa un total di 417.5 mion florin. A kompensá e défisit operashonal di 417.5 mion florin ku entradanan no struktural di 369.7 mion florin. Entradanan no struktural di 369.7 mion florin tabata konsistí di: (1) dividendo no struktural di kompania di Gobièrnu di Kòrsou pa un total di 125.5 mion florin, (2) entradanan no struktural di belasting di NFR/BRK (tratado di belasting di Reino Hulandes) pa 149.7 mion florin i (3) vrijval di reservá/voorzieningen pa un total di  94.5 mion florin. Pues durante e periodo 2011 te ku 2016, e kuenta koriente di Pais Kòrsou ya kaba tabata tin un défisit final akumulá di 47.8 mion florin (défisit operashonal di 417.5 mion negativo plùs e 369.7 mion florin positivo na entradanan no struktural). Tambe a base di Rapòrtnan di Maneho Finansiero di desèmber 2017 i 2018 por bisa tambe ku entradanan no struktural a keda limitá na 46.5 mion florin kual tabata konsistí di: (1) dividendo di kompania di gobièrnu pa un total di -0.7 mion florin, (2) entradanan di belasting di NFR/BRK (tratado di belasting di Reino Hulandes) di 31.7 mion florin i (c) vrijval di reservá/ voorzieningen di 15.5 mion florin. Konklushon ta ku for di 1 yanüari 2017, entradanan no struktural ta kabando rápidamente pa loke ta e kuenta koriente di Pais Kòrsou i ku a trese retonan adishonal pa Gobernashon di Pais Kòrsou.

Segun parlamentario Curtley Obispo e sifranan ariba menshoná ta mustra ku Gobièrnunan anterior pa loke ta e kuenta koriente di Pais Kòrsou den pasado no a aktua i  no a krea solushonnan struktural segun leinan fiskal di Kòrsou pa asina garantisá entradanan struktural risibí for di tur i tur kontribuyentenan di belasting. Kual tambe ta splika bon kla kon Pais Kòrsou tin miónes di florin riba kaya pa kobra di kontribuyentenan di belasting. Ta lapi a lapi ku entradanan no struktural den añanan 2011 te ku 2016 pa asina balansa presupuestonan i tambe kumpli ku e normanan finansiero di artíkulo 85 insiso 2 i 4 di nos Areglo di Estado di Kòrsou (nos lei máksimo). Tur hende ku sa di finansa públiko sa bon bon ku esaki ta e realidat: ta krea a krea mas retonan i problemanan i a skùif e retonan pa futuro, kual ta buta ku awor de presente i futuro tin ku atendé esakinan durante e periodo di Gobernashon 2017-2021. Tin ku aktua i trese solushonnan struktural pa loke ta e défisit operashonal di e kuenta koriente di Pais Kòrsou. Aktua primordialmente pa garantisá e entradanan di Pais Kòrsou di tur i tur kontribuyentenan di belasting. Esaki ku e meta final pa kumpli i garantisá gastunan kolektivo di Pais Kòrsou na bienestar i progreso di henter Pais Kòrsou

Potret 2019 parlamentario Curtley Obispo

Advertisements

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.