Willemstad- Den kuadro di optimalisashon i ampliashon di oportunidat pa nos hóbennan i teniendo kuenta ku e nesesidat di merkado laboral, pa ougústus próksimo ta e intenshon pa kuminsá ku un estudio nobo di hortikultura riba nivel 2 i 3. E estudionan aki ta keda ofresé dor di Maris Stella SBO (RK) na Grebbelinieweg.

E estudio den hortikultura ta pone atenshon riba diferente tema, manera entre otro kultivo di plantashon, preparashon di un tereno, atendé sistemanan di pasa pipa/ drainage, awa/ pone bassin/ traha laguna artifisial, trabounan di konstrukshon, kòrta mata, pone fasilidatnan tékniko. pone i mantene un area bèrde.

Alabes ta duna atenshon na materianan general manera idiomanan Papiamentu, Hulandes, Ingles i Spañó i tambe formashon di e siudadania en general. Despues di estudio riba nivel 2 of 3 e persona mester por entre otro bou di guia, pone lokual ta bèrde (groen) i mantené esaki. Esaki por ta den kuranan partikular, pero tambe pa e seno gobernamental i den parkenan.

Riba e fotonan na momento ku Direktor di skolnan katóliko sra. L.van lamoen-Garmers ta entregá e proposishon na Minister M. Alcalá-Wallé, kompañá pa sra. N. Lo-A-Tjong, Directeur di Maris Stella SBO i sr. W. Kleinmoedig, Direktor di Sektor di Enseñansa i Siensia.